סאטמארע נייעס

פרייטאג ערש''ק אמור 'בצל הקודש' פון כ''ק רבינו הגה''ק שליט''א

ארום 9:30 איז רבינו שליט''א אריינגעקומען אין ביהמ''ד הגדול אין וומסב''ג צו תפילת שחרית אינאיינעם מיט די תלמידים פון די 6 ישיבות קטנות און תלמידי כתה ט' מכינה לישיבה.
פארן דאווענען האט דער רבי תפילין געלייגט פאר נכדו חתן הבר מצוה כמר יקותיאל יהודה ני''ו בן הרה''ג ר' יואל הכהן הכהן גלאנץ שליט''א, און דערנאך ארויפגעדרייט די כריכות היד.

נאכן דאווענען איז פארגעקומען א מסיבת לחיים לכבוד המאורע, ולכבוד פסח שני, מען האט געזינגען עטליכע ניגונים לכבוד המאורע.
רבינו שליט''א האט געטרינקן לחיים און געוואונטשן ברכות קדשו און משמיע געווען דברות קודש לכבוד הנחת תפילין פון נכדו, און צום סוף גערעדט דברי הדרכה פאר די בחורים בשנות הבחרות.
נאך די דב''ק האט מען ממשיך געווען צו זינגען חסל סידור פסח לכבוד פסח שני. מען האט געענדיגט ארום 11:25.

בביתו נאוה קודש האט זיך רבינו שליט''א געוואשן צו א געהעריגע סעודה לכבוד פסח שני, מען האט אויפגעגעבן מצות און קניידלעך ומאכלי פסח כנהוג, עס האט זיך פארצויגן א שיינע שמועס במנהגי פסח שני, ווען ס'איז דער מנהג צו מאכן די סעודה לכבוד היום, צו ביים זמן הקרבת הפסח דאס איז י"ד נאכמיטאג, צו ביים זמן אכילת הפסח ליל ט"ו, וואס ביי רבותיה"ק איז דער מנהג געווען ביום י"ד אחצ"ה.
מיט ברכהמ''ז האט דער רבי מכבד געווען הרה''ח ר' נפתלי הירצקא שטיין הי''ו.
עטליכע מינוט פאר חצות היום איז רבינו שליט''א צוריק ארויסגעפארן לביתו נאוה קודש בקר''י.

▫️ סאטמאר'ע נייעס 🌴 ▫️

דאנערשטאג פרשת אמור 'בצל הקודש' פון כ''ק מרן רבינו הגה''ק שליט''א

רבינו שליט''א האט געדאווענט שחרית בהיכל המתיבתא סניף ברך משה. פארן דאווענען האט דער רבי תפילין געלייגט פאר די בר מצוה בחורים.
ב"ר חיים בנציון ליבערמאן הי"ו.
ב"ר חיים יעקב מרדכי זופניק הי"ו.
ביים ליינען איז דער רבי געגאנגען הגבה, און נאכן דאווענען פארגעלערנט א שיעור סוגיא משיעורי הישיבה, דערנאך איז פארגעקומען א לחיים מיט די בר מצוה בחורים בחדרו הפרטי.

נאכמיטאג ארום 6:45 האט דער רבי געדאווענט מנחה בביתו נאוה קודש.

ארום 7:15 האט זיך רבינו שליט"א ארויסגעלאזט אויפן וועג קיין וומסב''ג, ביים אנקומען האט דער רבי מנחם אבל געווען משפחת הרה"ח ר' אברהם יצחק פראנצויז הי"ו, ע"פ אשתו ע"ה.

רבינו שליט''א האט געדאווענט מעריב ביים זמן ר"ת ארום 9:10 בהיכל התורה בקומת ריספלער בבית מדרשינו הגדול, בעל תפילה: הרה"ח ר' דוד הערש מערץ הי"ו, נאך מעריב האט דער רבי געציילט ספירה פארן עמוד.

ארום 9:30 איז רבינו שליט''א אריינגעקומען אין ביהמ"ד הגדול צו די שמחת הבר מצוה פונעם ערשטן איר אייניקל, הב' הרב יקותיאל יהודא בן הרה"ג רבי יואל הכהן גלאנץ שליט"א מו''ץ בקהלתינו חתן הגה"צ אבד''ק וומסב"ג שליט"א, חתן הגה"צ אבד"ק ב"פ שליט"א. במקהלות עם בבית מדרשינו הגדול אין וומסב"ג.
דער רבי האט זיך געוואשן צו די סעודה און נאך די פיש געוואונטשן לחיים פארן בר מצוה בחור, די זיידעס, און פארן גאנצן ציבור, במשך די סעודה האט מען געזינגען זענען מערערע ניגוני שמחה בשבח והודי', און אויך מניגוני פסח.
פאר די פיש האט דער בר מצוה בחור געמאכט א סיום אויף ששה סדרי משנה, און דער זיידע הרה"צ רבי יחזקאל גלאנץ שליט"א מבארדיוב האט געזאגט דעם קדיש דרבנן.
עס האבן אויפגעטרעטן דער עלטער זיידע הגה"צ אבד"ק ב"פ שליט"א די זיידעס הגה"צ מבארדיוב שליט"א, און הגה"צ אבד''ק וומסב''ג שליט"א, און דער אבי הבר מצוה הרה"ג ר' יואל שליט"א.
נאך די פלייש האט דער בר מצוה בחור געזאגט די פשעטיל, דערנאך האבן די תלמידי כיתה ט' פארגעזינגען חרוזים לכבוד המאורע.

רבינו שליט''א האט משמיע געווען דב"ק, קודם א הערליכן דרוש לכבוד פסח שני, זאגענדיג 'פסח שני איז דאך מארגן ווען סאיז געווען די הקרבת הפסח, אבער ד"ת קען מען שוין זאגן לכבוד פסח שני', און דערנאך געזאגט דברי אגדה לכבוד הבר מצוה, און דערביי ארויסגעברענגט רגשי לבבו 'שהחיינו וקימנו והגיענו לזמן הזה' אז הקב"ה האט געגעבן די זכיה אז מען קען זיך באטייליגן ביי א בר מצוה פון א דור רביעי, און נאכגעזאגט פון זקינו הגה''ק הישמח משה זיע''א אז 'כל שרואין זה בזה בדברי תורה' אז דריי דורות לערנען תורה צוזאמען דעמאלטס איז מען זוכה צו די ברכה פון 'לא ימישו מפיך ומפי זרעך ומפרי זרע זרעך מאתה ועד עולם', און דאס גיבט די כוחות זיך צו שלאגן מיטן יצר הרע, מיט רירענדע הרגישים האט דער רבי דערמאנט די דב"ק וואס אביו רביה"ק זיע''א האט געזאגט ביי זיין (רבינו שליט"א) בר מצוה מיט זעכציג יאר צוריק, אויף 'ראות פניך לא פללתי והנה הראה אותי אלקים גם את זרעך' אז 'הראה אותי' מ'זעט 'זיך' אפשפיגלען אויף די קינדער, מזעהט ווי די קינדער גייען בדרכי אבות, און ארויסגעברענגט א שיר ושבח פאר הקב"ה וואס האט געגעבן די געלעגענהייט צו דערלעבן אזא שמחה, און מסיים געווען מיט דברי הדרכה פארן בר מצוה בחור, אז צו ווערן א גדול בתורה דאס קומט נאר דורך האראווען, און דאן געגעבן ברכת קדשו פאר די חשובע זיידעס, און פארן גאנצן ציבור.
מיט ברכהמ''ז האט דער רבי מכבד געווען דער בר מצוה בחור כנהוג. מען האט געענדיגט ארום 11:30. און דער רבי איז אהיים לביתו נאוה קודש בוומסב''ג.

▫️ סאטמארע נייעס 🌴 ▫️

מיטוואך פרשת אמור 'בצל הקודש' פון כ''ק מרן רבינו הגה''ק שליט''א

אינדערפרי איידער תפילת שחרית איז פארגעקומען די ברית'ן.
לבן הנולד אצל ר' משה יוסף פאללאק הי"ו, ווי דער רבי איז געווען סנדק ומוהל.
לבן הנולד אצל ר' משה בער ניישטאדט הי"ו, ווי דער רבי איז געווען סנדק ומוהל.
לבן הנולד אצל ר' מאיר לעווי הי"ו, ווי דער רבי איז געווען סנדק.
לבן הנולד אצל ר' יושע העשיל גאלדשטיין הי"ו, ווי דער רבי איז געווען סנדק.
לבן הנולד אצל ר' יואל ברמ"ח ווייס הי"ו ווי דער רבי איז געווען סנדק.

רבינו שליט''א האט געדאווענט שחרית בהיכל ישיבה קטנה סניף אבני צדק בהנהלת הרה''ג ר' חיים אליעזר דאווידאוויטש שליט"א.
פארן דאווענען האט דער רבי תפילין געלייגט פאר די בר מצוה בחורים.
בן המנהל הר"ר חיים אליעזר דאווידאוויטש שליט"א.
ב"ר זלמן לייב פעקעטע הי"ו.

נאכן דאווענען איז פארגעקומען א מסיבת לחיים בהיכל הביהמ"ד, מען האט געזינגען עטליכע ניגונים דער רבי האט געטרינקן לחיים און געוואונטשן ברכות קדשו, און משמיע געווען דברות קודש.

נאכן דאווענען איז דער רבי אראפ אויף א באזוך אינעם אונטערשטן שטאק פונעם בנין ווי עס געפינט זיך א סניף פון הייליגן מוסד הק' שערי חמלה.

דערנאך האט רבינו שליט''א מנחם אבל געווען משפחת אינדיג, הרה"ג ר' ארי' אשר אינדיג שליט"א דומ''ץ ביהמ"ד מהרש"א, ואחיו הרבני הנגיד ר' מאיר יעקב אינדיג הי"ו, ע"פ אמם ע"ה.

נאכמיטאג איז רבינו שליט''א ארויף בהיכל הישיבה סניף ויואל משה ווי דער רבי האט געלערנט מיט א חברותא מתלמידי הישיבה בחדרו הפרטי, און ארום 6:30 האט דער רבי געדאווענט מנחה אין ישיבה.

זמני כניסה בקו"פ איז געווען פון 8:30 ביז 12:50 אויפדערנאכט, בביתו נאוה קודש אויף איהעל קט.

בעת די זמני כניסה איז געווען אויף א באזוך כ"ק אדמו"ר מקהל חסידי ירושלים שליט"א, עס האט זיך פארמירט א שיינער שמועס איבער די הילולא קדישא פונעם תנא אלוקי רשב"י אין מירון בפרט, און איבער די גאנצע וועלט, דער רבי האט אים מכבד געווען מיט לחיים און מאציל געווען מברכות קדשו און ארויסבאגלייט ביז צו די גאס.

דער רבי האט געדאווענט מעריב ארום 12:50 בביתו נאוה קודש.

▫️ סאטמאר'ע נייעס 🌴 ▫️

קול רנה וישועה באהלי צדיקים

ברגשי גילה וחדוה גרייטן זיך אנ''ש צו די שמחת הבר מצוה פונעם ערשטער דור רביעי פון כ''ק רבינו הגה"ק שליט"א, הב' הרב יקותיאל יהודא בן הרה"ג רבי יואל הכהן גלאנץ שליט"א חתן הגה"צ אבד''ק וומסב"ג שליט"א, וואס וועט פארקומען היינט אויפדערנאכט בבית מדרשינו הגדול אין וומסב"ג.

מארגן פרייטאג וועט פארקומען דער מעמד הנחת תפילין אין ביהמ"ד הגדול אין וומסב"ג, רבינו שליט"א וועט דאווענען תפילת שחרית אינאיינעם מיט די תלמידי ישיבות קטנות און תלמידי כתה ט' מכינה לישיבה, פארן דאווענען וועט דער רבי לייגן תפילין פאר נכדו היקר ני''ו, און נאכן דאווענען וועט אי"ה געפראוועט ווערן א מסיבת לחיים לכבוד המאורע.

שישו ושמחו בשמחת רבינו

▫️ סאטמאר'ע נייעס 🌴 ▫️

דינסטאג פרשת אמור 'בצל הקודש' פון כ''ק מרן רבינו הגה''ק שליט''א

אינדערפרי איידער תפילת שחרית איז פארגעקומען די ברית'ן.
לבן הנולד אצל ר' משה יודא פייערשטיין הי"ו, ווי דער רבי איז געווען סנדק.
לבן הנולד אצל ר' מענדל גרשון בר"ב פעלדמאן הי"ו, ווי דער רבי איז געווען סנדק ומוהל.

רבינו שליט''א האט געדאווענט שחרית בהיכל ישיבה קטנה סניף זרע קודש בהנהלת הרה''ג ר' יואל אשר ווידער שליט"א. פארן דאווענען האט דער רבי תפילין געלייגט פאר'ן בר מצוה בחור ב"ר יואל שניטצער הי"ו.
רבינו שליט''א האט געצינדן 5 ליכט לרגל די יומדהל''ק פון הרה"ק בעל זרע קודש מ'ראפשיץ זיע''א.

נאכן דאווענען איז פארגעקומען א מסיבת לחיים לרגל די הילולא קדישא, דער רבי האט געטרינקן לחיים און משמיע געווען דב"ק במשנתו פונעם בעל הילולא דער תפקיד פון א איד בעוה"ז, און די התחייבות פון זיך נישט נאכצוגעבן די תאוות און מסיים געווען בברכות קדשו.

אין די נאכמיטאג שעה'ן איז רבינו שליט''א אריבער אויף די וועכענטליכע באזוך אינעם בית השחיטה המהודרת אינאיינעם מיט הרבני הנגיד מוה"ר חיים הערש פריעדמאן הי"ו פון מאנטרעאל, בעה''ב פונעם בארימטער אגרי סטאר בית השחיטה אין פאסטוויל אייאווע, ווי ס'קומט פאר די מערכת השחיטה המהודרת לגסות שע"י קהילתינו הק'. דער רבי איז ארום געגאנגן א לענגערע צייט איבער'ן גאנצן פלענט און האט צוגעוויזן די פילצאליגע חומרות והידורים וועלכע זענען איינגעשטעלט אינעם בית השחיטה המהודרת.

דערנאך איז רבינו שליט''א אהיימגעפארן לביתו נאוה קודש, און נאך א פריוואטע אוידענץ מיט'ן רבין איז פארגעקומען דער היסטארישער מסיבת לחיים לכבודו פונעם נדיב הנכבד הרבני הנגיד מוה"ר חיים הערש פריעדמאן הי"ו וואס האט מנדב געווען דעם אסטראנאמישן סכום פון צעהן מיליאן דאללאר לטהרתן של ישראל, פאר'ן נייעם בנין האדיר פון די מקוה טהרה אין קרית יואל יצ"ו.

ביים לחיים האבן זיך אויך משתתף געווען ראשי והנהלת הקהילה, עס האט זיך פארמירט א שיינע שמועס, דער רבי האט צווישן אנדערע ארויסגעברענגט דער יחוס פונעם חשובן נדבן, זייענדיג א סיגוטער אפשטאמיגער מבית אבותיו, און טראגט דעם הייליגן נאמען פון מרן העצי חיים זצוק"ל, און האט ארויסגעברענגט די גרויסע זכיה פונעם נדבן החשוב צו מרבה זיין טהרה בישראל, און די חשיבות פון בויען א מקוה לטהרתן של ישראל.

דער רבי האט געטרינקן לחיים און גאר ווארעם מאציל געווען מברכות קדשו פארן נדבן שיחי' און זיין גאנצע משפחה בברכות לרוב, און דערנאך אינטערגעשריבן די שטרות אינאיינעם מיטן נדבן. דערביי האט רבינו שליט"א קורא שם געווען פאר די נייע גאס, ווי די פארגרעסטע חלק פונעם בנין המקוה ווערט געבויעט על שם הנדבן 'הערשי פריעדמאן דרייוו' לכבודו ולזכותו.

ארום 6:45 האט דער רבי געדאווענט מנחה בביתו נאוה קודש און דערנאך איז רבינו שליט''א אריינגעפארן קיין וומסב''ג צו די וועכנטליכע זמני כניסה.
זמני כניסה בקודש פנימה איז געווען פון ארום 8:30 ביז 11:45 אויפדערנאכט בביתו נאוה קודש אויף היוז סט.

בעת די זמני כניסה זענען אריין בקו''פ חברי הנהלת כולל שומרי החומות מקבל זיין ברכת הקודש לקראת זייער דינער השנתי אין וומסב''ג קומענדיגן דאנערשטאג. הרה"ג ר' משה ראזענפעלד שליט"א דומ"ץ בית מדרשינו ברך משה ד'קהלתינו ומגבאי הכולל האט איבערגעגעבן א רעפארט פאר רבינו שליט"א איבער די לעצטיגע פעולות הכולל, און דער רבי האט מאציל געווען מברכות קדשו.

דער רבי האט געדאווענט מעריב ארום 10:30, און דערנאך ווייטער ממשיך געווען אויפנעמען דעם ציבור.

▫️ סאטמאר'ע נייעס 🌴 ▫️

מאנטאג פרשת אמור 'בצל הקודש' פון כ''ק מרן רבינו הגה''ק שליט''א

אינדערפרי איידער תפילת שחרית איז פארגעקומען די ברית'ן.
לבן הנולד אצל ר' יואל ברי"פ גלאנצער הי"ו, ווי דער רבי איז געווען סנדק ומוהל.
לבן הנולד אצל ר' יהושע שטיין הי"ו, ווי דער רבי איז געווען סנדק ומוהל.

רבינו שליט''א האט געדאווענט שחרית בהיכל המתיבתא סניף דברי יואל. ביים ליינען האט דער רבי עולה געווען שלישי, און נאכן דאווענען פארגעלערנט דעם טעגליכן תהילים שיעור אויף קאפיטל ט"ו פסוק ב'.

נאכן דאווענען איז פארגעקומען א ברית לבן הנולד אצל ר' אברהם שלמה בערנאטה הי"ו, אין ביהמ"ד בית שלום, ווי דער רבי איז געווען סנדק.

נאכמיטאג ארום 3:30 איז דער רבי ארויפגעגאנגן אין די ישיבה, בהיכל המתיבתא סניף קדושת יואל, ווי דער רבי האט משמיע געווען די דרשת פתיחת הזמן פאר די אריבער 1,000 תלמידי המתיבתא פון אלע סניפים, נאך די דברי דרוש ואגדה אויף די וואכעדיגע סדרה, האט דער רבי מעורר געווען איבער די תקנות הישיבה ובדברים הצריכים חיזוק אין אלע ענינים, תורה, תפילה, חסידות, שמירות עינים, גיין אין מקוה יעדן טאג, זיין אפגעהיטן פון די טעכנעלאגישע כלים, און ארומגערעדט איבער די געהויבנקייט פון די שבתים אין די ישיבה און די ערענסקייט פון סעודת רעוא דרעוין, און מחזק געווען בכל תוקף די תקנה פון רביה"ק מייסד הישיבה זיע''א נישט צו גיין צו חתונות און די זעלבע צו תנאים'ס און שבע ברכות און דערביי ארויסגעברענגט די זכי' וואס די בחורים האבן צו לערנען אין די ישיבה פון רביה"ק זיע''א און צו זיין מתלמידיו הנאמנים, דערנאך האט דער רבי מסיים געווען בברכות לרוב.

דער רבי האט געענדיגט ארום 4:30, און נאך עטליכע מינוט אריינגעקומען צו תפילת מנחה בהיכל הביהמ"ד, מען האט געענדיגט ארום 5:00.

זמני כניסה בקודש פנימה איז געווען פון ארום 8:15 ביז 12:30 אויפדערנאכט, בביתו נאוה קודש אויף איהעל קט.

רבינו שליט''א האט געליינט תנאים אין די תנאים זאל בביתו נאוה קודש פון די מחותנים ר' אברהם משה לעבאוויטש הי"ו - ר' מאיר פאלקאוויטש הי"ו.

בעת די זמני כניסה איז אריין בקו''פ הגה"צ ר' טוביה שטערן שליט"א גאב"ד מירון, עס האט זיך פארמירט א שיינע שמועס איבער פארשידענע מנהגים און מעשיות פון מירון, ווי אויך האט דער רבי ארומגערעדט מיט געגועין איבער דעם גרויסן שב"ק אין מירון שבת פקודי תשע"ו, און איבער די געהויבענע נסיעות קיין מירון פון אביו רביה"ק בעל ברך משה זיע''א, און דער רבי האט אים מאציל געווען מברכות קדשו מען זאל קענען שטיין על המשמר צו היטן אויף קדושת המקום און הילולא דרשב"י.

דער רבי האט געדאווענט מעריב ארום 12:30 בביתו נאוה קודש.

▫️ סאטמאר'ע נייעס 🌴 ▫️

זונטאג פרשת אמור 'בצל הקודש'פון כ''ק מרן רבינו הגה''ק שליט''א

רבינו שליט''א האט געדאווענט שחרית בהיכל המתיבתא סניף קדושת יואל. פארן דאווענען האט דער רבי תפילין געלייגט פאר די בר מצוה בחורים:
ב"ר יואל הלוי הירש הי"ו.
ב"ר אליעזר זוסיא סופר הי"ו.
ב"ר שמואל דוד מארקאוויטש הי"ו.
ב"ר יחזקאל שרגא בריסק הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל ט"ו פסוק א', דערנאך איז פארגעקומען א לחיים מיט די בר מצוה בחורים בחדרו הפרטי.

נאכמיטאג איז דער רבי ארויף בהיכל הישיבה סניף ברך משה ווי דער רבי האט געלערנט מיט א חברותא מתלמידי הישיבה בחדרו הפרטי, און ארום 6:15 האט דער רבי געדאווענט מנחה אין ישיבה.

זמני כניסה בקודש פנימה איז געווען פון ארום 8:00 ביז 11:50 אויפדערנאכט, בביתו נאוה קודש אויף איהעל קט.

רבינו שליט''א האט געליינט תנאים אין די תנאים זאל בביתו נאוה קודש פון די מחותנים ר' יואל ברי''י בלייך הי"ו - ר' יואל יצחק גרינוואלד הי"ו.

במשך די זמני כניסה האט זיך געשטעלט צום פארהער ביי רבינו שליט"א הבה"ח שלמה אהרן ב"ר משולם צבי זילבערשטיין הי''ו (וומסב"ג) מתלמידי המתיבתא סניף קדושת יואל, אויף גאנץ יו"ד ח"א.

דער רבי האט געדאווענט מעריב ארום 11:50 בביתו נאוה קודש.

▫️ סאטמארע נייעס 🌴 ▫️

שב''ק פרשת אח"ק 'בצל הקודש' פון כ''ק מרן רבינו הגה''ק שליט''א

פרייטאג צונאכטס ארום 8:25 איז רבינו שליט''א אריינגעקומען אין ביהמ''ד מעוטף בטליתו און צוגעגאנגען צו מנחה, קבלת שבת: הרה"ח ר' יוחנן מאנן הי"ו.
נאכן דאווענען איז פארגעקומען א אפיעל פאר ישיבת נתיבות התלמוד אין בני ברק עטה"ק, מען האט געענדיגט ארום 10:00, דער עולם איז אריבער זאגן גוט שבת, און דער רבי איז אריין בחדרו הפרטי.

א קורצע צייט נאכן דאווענען איז רבינו שליט''א אריינגעקומען צום שלחה''ט בהיכל השלחנות אינאיינעם מיט די תלמידי המתיבתא, און אנגעהויבן כדרכו בקודש שלום עליכם ברגש ובנעימה.
אשת חיל: נכד רבינו הב' מאיר אליעזר ט"ב בן הגה"צ רב דביהמ"ד ברך משה שליט"א, הגבהת הכוס: הרה"ח ר' יוסף משה אונגאר הי"ו (מאנסי).

מיט די זמירות האט רבינו שליט''א מכבד געווען: כל מקדש: הרה"צ ר' בערל גלאנץ שליט"א מבארדיוב קר''י, מנוחה ושמחה: הרה"ח ר' יוסף משה אונגאר הי"ו.

רבינו שליט''א האט געזאגט תורה אויפן מדרש 'בשעה שנכנסו שני פולמוסין דנורא בחוטמיהן של נדב ואביהוא' און געטייטשט בדרך דרוש אין די סוגיא פון עשה דוחה לא תעשה.

קה אכסוף: הר"ר שמואל זאנוויל פאגעל הי"ו (ירושלים), ברכהמ''ז: נכד רבינו הרב יושע לאבין חתן הגה"צ רב דביהמ"ד ברך משה שליט"א.

עובדות וסיפורים די וואך האט רבינו שליט''א דערציילט פון הרה''ק הזרע קודש מראפשיץ זיע''א וואס די יארצייט געפאלט דינסטאג י"א אייר.

קה רבון עלם: הרב יואל ישראל וואגשאהל שליט"א (מאנסי), די פרישע חתנים זענען אדורך נעמען פירות, אז ביום השביעי: הרה''ג ר' נתן דוב ברש"ז שווארץ שליט"א. מען האט געענדיגט ארום 1:30.

וביום השבת קודש

שב''ק אינדערפרי איז רבינו שליט''א אריינגעקומען ארום 9:35. פסוקי דזמרה: הרה"ח ר' יוסף משה אונגאר הי"ו, צו שחרית איז דער רבי צוגעגאנגען.

הוצאה והכנסה: הרה"ח ר' שמואל זאנוויל פאלאטשעק הי"ו, פסוקי שמע ישראל: הרה"ח ר' שמחה הערשקאוויטש הי"ו (וומסב''ג).

עליות. כהן: ר' יואל ברי"פ גלאנצער הי"ו. לוי: ר' יואל ברוך אונגאר הי"ו - דער רבי האט קורא שם געווען לרגל הולדת בתו למז''ט. שלישי: ר' יעקב בר"ל עפשטיין הי"ו - דער רבי האט קורא שם געווען לרגל הולדת בתו למז''ט. רביעי: ר' חיים שמעון גלויבער הי"ו - דער רבי האט קורא שם געווען לרגל הולדת בתו למז''ט. חמישי: הרה"ח ר' אברהם פילאפף הי"ו. שישי: רבינו שליט''א. שביעי: הרה"ח ר' ליפא עפשטיין הי"ו (מאנטרעאל). אחרון: הרה"ח ר' יצחק פנחס גלאנצער הי"ו. מפטיר: הרה"ח ר' יעקב זוסמאן סופר הי"ו. הגבה: הרה"ח ר' אהרן זאב גלויבער הי"ו (וומסב''ג). גלילה: הב' אהרן האלבערשטאם ני"ו נכד כ"ק אדמו"ר מבאבוב שליט"א.

מוסף: הרה"ח ר' שלמה משה קלאגסברוין הי"ו. פתיחה לאנעים זמירות: הרה"ח ר' שלמה דוד דאסקאל הי"ו. מען האט געענדיגט ארום 12:30.

רעוא דרעווין

צו מנחה ושל''ש איז רבינו שליט''א אריינגעקומען ארום 8:20. מנחה: ר' יעקב משה מיטטעלמאן הי"ו, הוצאה והכנסה: הרה"ח ר' חיים בער אדלער הי"ו. כהן: הרה"ח ר' משה הכהן גלאנצער הי"ו (וומסב''ג). לוי: הרה"ח ר' נחמן דוב העללער הי"ו (וומסב''ג). שלישי: הרה"ח ר' שמעון שטערן הי"ו (מאנסי). הגבה: רבינו שליט''א. גלילה: הרה"ח ר' יצחק יעקב כ"ץ הי"ו.

זמירות ביי של"ס האט דער רבי מכבד געווען. אודה: הרה"ח ר' נח גפן הי"ו, שיר המעלות: הרה"ח ר' משה גאלדשטיין הי"ו.

רבינו שליט''א האט געזאגט תורה אויפן פסוק 'דבר אל כל עדת בני ישראל ואמרת אליהם קדושים תהיו' און געטייטשט אז דורך עוסק זיין בתורה איז די תורה מאיר עיניהם פון א מענטש נישט צו ווערן פארפירט פון די יצר הרע, דאס איז אבער נאר אז מען צעברעכט די תאוות ווייל אז נישט קען מען חלילה נכשל ווערן בעבירות חמורות ביודעים ובלא יודעים, דאס איז קדושים תהיו אויף די תאוות ההיתר, ובפרט בימי הספירה וואס איז מיחוד לטהרינו ולקדשינו בקדושתך העליונה.

ידיד נפש: הרה"ח ר' יודל שטיין הי"ו. קל מסתתר: הרה"ח ר' נחמן דוב העללער הי"ו. דער רבי האט געבענטשט אויפן כוס.

מעריב מוצש''ק: הרה"ח ר' שלמה זלמן שטיין הי"ו. נאך הבדלה איז מען אריבער זאגן א גוטע וואך. מען האט געענדיגט ארום 10:40.

נאך הבדלה האט דער רבי מנחם אבל געווען הרה"ח ר' חיים אפרים ווייס הי"ו, ע"פ אביו ע"ה.

שפעטער זענען אריין בקו''פ בביתו נאוה קודש א קבוצה בחורים מתלמידי ישיבה גדולה באבוב וועלכע האבן געוויילט אויף שבת בצל הקודש, דער רבי האט זיך נאכגעפרעגט אויף די לימודים און משמיע געווען דברי ברכה, און די בחורים זענען אריבער מקבל זיין ברכת הקודש.

▫️ סאטמאר'ע נייעס 🌴 ▫️