Satmara Niyes

ואתם כתבו על היהודים בשם המלך

רבבות תלמידי וחסידי סאטמאר גרייטן זיך בהכנה דרבה, בהרגש קודש, ובשמחה רבה צום מעמד נרגש ומרומם סיום כתיבת ספר תורה פונעם הייליג'ן ספר וואס ווערט אריינגעגעבן דורך אבינו רועינו כ"ק מרן רבינו הגה"ק שליט"א, בהתאסף ראשי עם יחד אלופי אלפי ישראל, קומענדיגע מוצש"ק תרומה-זכור, אינעם גיגאנטישן "אודיטאריום" הענקי בקרית יואל.

די מעמד וועט זיין א חטיבה אחת פון דביקות, געגועים, התרוממות הנפש, והתרגשות דקדושה, לכל הקהל הקודש אנגעהויבן מיטן הכנה ביים 'מעמד נורא' די ניגוני התעוררות ודביקות, דערנאך וועט קומען א שטארקער הויכפונקט ווען דער גרויסער בעל שמחה ומאורן של ישראל כ"ק מרן רבינו הגה"ק שליט"א וועט משמיע זיין דברות קודש זיקוקין דנהורא בהתרגשות לבו הטהור, ארויסצוברענגען די פערזענליכע הרגשים און איבער די עת רצון אין אזא מאמענט, באגלייט מיט ספעציעלע דברי חיזוק והדרכה ולרומם עמוד התורה.

דאן ווען קומען די קלימאקס פונעם הייליגן מעמד און מרוגשדיגער מחזה ווען די ציבור לאלפים וועט האבן די זכיה און זען ווי דער מנהיג העדה כ"ק מרן רבינו הגה"ק שליט"א נעמט די 'קסת הסופר' מיט א הייליגער ציטער און התרגשות קודש אריינשרייבנדיג די 'לעצטע' אות אינעם ספר תורה און דערמיט זוכה לברך על גומרה של תורה, די מצוה נדירה פון "ועתה כתבו לכם את השורה הזאת, ולמדה את בני ישראל". און ווי די רבי מאכט הגבה אויפן הייליגן ספר, נאכגעפאלגט מיט אמירת לחיים וברכת קודש פארן ציבור לאלפים, צום שלוס וועט זיך דער זאל הייבן אין התלהבות'דיגע ריקודין של שמחה והודאה, בהתאסף ראשי עם יחד אלפי ישראל אין שפיץ פונעם רבין שליט"א, בהתרוממות הלבבות 'לשמוח בשמחת רבינו, ובשמחת התורה'.

עליונים ששו ותחתונים עלזו, אשרי עין ראתה קהל קדושים רוגשים בשמחת התורה, גדול וקדוש יהיה כבוד המעמד הזה

▫️ סאטמאר'ע נייעס 🌴 ▫️

הדרן עלך שלש בבות, עבידנא יומא טבא לרבנן

פראכטפולער "סיום שלש בבות והתחלת מס' סנהדרין" פאר אלפי לומדי "תורתך שעשועי" תושבי קרית יואל וועט פארקומען היינט מאנטאג משפטים אין זאלן פון בית רחל פארדייס.

שִֹישֹוּ וְשִֹמְחוּ בְּשִֹמְחַת תּוֹרָה: וועט פארקומען מפוארה ברוב פאר והדר, במקהלות אלפי הלומדים, ביקר עטרת תפארת, מיט גלאנץ און פּראכט, לכבודה של תורה, אין א ריין תורה'דיגע און מלכות'דיגע אטמאספערע,
א גאר רייכער פּראגראם לכבודה של תורה, סעודת מצוה רחבה ומפוארה, ריקודין של שמחה, און הערליכע דרשות ברום מעלת ומתיקות לימוד התורה דורך וועלט בארימטע דרשנים, מגידים מפורסמים פון העכסטן קאליווער, וואס וועט געבן דעם ריכטיגן חיזוק ואומץ צו גיין ווייטער מחיל אל חיל בהתחלת מס' סנהדרין.

וועט פארקומען בראשות די מייסד ונשיא החבורה מרא דאתרא קדישא כ"ק מרן רבינו הגאון הקדוש שליט"א וועלעכע וועט משמיע זיין דעם משא המעמד ודבר ה', דברות קודש ודברי התחזקות פאר די אלפי לומדי החבורה די בכל אתר ואתר, מען וועט קענען מיטהאלטן די לייוו הוק-אפ אויף מערכת "קול סאטמאר".

"הדרן עלך שלש בבות". דער אומגלויבליכער צאל פון טויזענטער לומדים תושבי קרית יואל אין די בארימטע גמרא-חבורה "תורתך שעשועי ד'סאטמאר", זענען אין די יעצטיגע טעג איינגעהילט אין העכערע אומבאשרייבליכע געפילן פון התרוממות הנפש בבחינת "ברנה יקצורו", שטייענדיג ווירקליך ביים מאמענט פון "שניידן די פירות" פון גאנצע אכט יאר עמל התורה, ווען עס ווערט אין א גוטע שעה געפייערט דער היסטארישער מאמענט "סיום שלש בבות", וואס פלעכט אריין אין די קומענדיגע מסכתא, מס' סנהדרין, על סדר הש"ס.

ובאו כולם בברית יחד לשמוח בשמחת התורה.

סאטמאר'ע נייעס 🌴