Satmara Niyes

פרייטאג ערש''ק אח"ק 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען א ברית לבן הנולד אצל ר' משה יודא פייערשטיין הי"ו, ווי דער רבי איז געווען סנדק.

דער רבי האט געדאווענט שחרית בהיכל ישיבה קטנה סניף זרע קודש בהנהלת הר"ר יואל אשר ווידער שליט"א לרגל די יומדה"ק פון הרה"ק בעל זרע קודש מראפשיץ זיע''א. פארן דאווענען האט דער רבי געלייגט תפילין פאר די בר מצוה בחורים.
- ב"ר שלמה זלמן הורוויץ הי"ו.
- ב"ר יעקב שלום הכהן טרעגער הי"ו.
- ב"ר יעקב קליין הי"ו.
דערנאך האט דער רבי געצינדן 5 ליכט לרגל די יומדה"ק.

נאכן דאווענען איז פארגעקומען א מסיבת לחיים בהיכל הביהמ"ד, מען האט געזינגען עטליכע ניגונים, דער רבי האט געטרינקן לחיים און אנגעוואונטשן פאר די בר מצוה בחורים, און פאר די רמ''י ותלמידי הישיבה, און משמיע געווען סיפורי קודש פונעם בעל הילולא.

▫️ סאטמארע נייעס 🌴 ▫️

דאנערשטאג פרשת אח"ק 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען א ברית לבן הנולד אצל ר' חיים מיכל שווארץ הי"ו, ווי דער רבי איז געווען סנדק און מוהל.

דער רבי האט געדאווענט שחרית בהיכל המתיבתא סניף ברך משה. פארן דאווענען האט דער רבי געלייגט תפילין פאר די בר מצוה בחורים.
- ב"ר חנני' יו"ט ליפא סאמעט הי"ו.
- ב"ר יואל ברמ"א רובינשטיין הי"ו.

ביים ליינען איז דער רבי געגאנגען הגבה, און נאכן דאווענען פארגעלערנט דעם טעגליכן תהילים שיעור אויף קאפיטל כ"ה פסוק י"א.

דערנאך איז פארגעקומען א מסיבת לחיים לרגל די שמחת קישור החיתון פון נכדו החתן פרע"ח הרב יצחק אייזיק שליט"א בן הגה"צ רב דביהמ"ד בית ברוך שליט"א. מען האט געזינגן עטליכע ניגונים, דער רבי האט געטרינקן לחיים און אנגעוואונטשן פאר נכדו החתן ני"ו, פאר בנו הגה"צ רב דביהמ"ד בית ברוך שליט"א, און פאר די בר מצוה בחורים, און פארן גאנצן ציבור. און משמיע געווען דב"ק, און ארויסגעברענגט די גרויסע שמחה אז מען טוט א שידוך פון נאך א אייניקל, און מסיים געווען מיט ברכות לרוב.
דער חתן האט געזאגט די פשעטל און מען האט אריינגעזינגן כנהוג, און ממשיך געווען מיט ניגוני שמחה, מען האט געענדיגט ארום 12:40.

ארום 5:20 איז רבינו שליט''א אנגעקומען בהיכל המתיבתא סניף דברי יואל צום דרשת פתיחת זמן הקיץ. דער רבי האט אנגעהויבן מיט דברי דרוש ואגדה, און דערנאך ממשיך געווען מיט הדרכה ומוסר פאר די בחורים, און מחזק געווען די תקנת הישיבה, און און מסיים געווען בדברי חיזוק פאר די בחורים בעניני השקפה און מען דארף זען אויסצוניצן די ימי הבחרות, און די זכי' וואס די בחורים האבן צו לערנען אין די ישיבה פון רביה"ק זיע''א, און צוגעענדיגט מיט דברי ברכה. מען האט געענדיגט ארום 6:10.

נאך די דרשה האט דער רבי געדאווענט מנחה בהיכל הישיבה, מען האט געענדיגט ארום 6:40.

זמני כניסה בקו''פ איז געווען פון 8:00 ביז 8:45 אויפדערנאכט, בביתו נאוה קודש אויף איהעל קט.

רבינו שליט''א האט געליינט די תנאים פון די מחותנים.
- הרה"ח ר' ישראל שמחה לאנדא הי"ו - הרה"ח ר' ליפא בר"ש האלפערט הי"ו.
- הרה"ח ר' יואל בר"ב פאלאטשעק הי"ו - הרה"ח ר' שלום אליעזר גאלדבערגער הי"ו.

ארום 9:10 איז רבינו שליט"א אריינגעפארן קיין בארא פארק צום שמחת התנאים פון נכדו החתן פרע"ח הרב יצחק אייזיק שליט"א, בן הגה"צ רב דביהמ"ד בית ברוך שליט"א. וואס איז פארגעקומען אין די זאל פון המספיק. דער רבי איז אנגעקומען ארום 10:20 און זיך באגריסט מיט די רבנים אויפן אויבנאן, און עס האט אויפגעטרעטן דער מחותן הגה"צ רב דביהמ"ד בית ברוך שליט"א.
דער רבי האט מסדר געווען די תנאים, און מכבד געווען דעם זיידן מצד הכלה הגה"צ ר' נחום מאיר גערמאן שליט"א ר"י באבוב צו ליינען די תנאים.
דער רבי האט געטרינקן לחיים און אנגעוואונטשן פארן חתן, מחותנים, זיידעס, און פארן גאנצן ציבור, און משמיע געווען דב"ק בעניני נישואין, און ממשיך געווען מיט עטליכע סיפורים בעניני נשואין פון די גרויסע זיידעס זיע''א פון וועם חתן כלה זענען אייניקלעך, און מסיים געווען מיט ברכות לרוב.
דער חתן האט געזאגט דאס פשעטיל און מען האט אריינגעזינגען כנהוג, און ממשיך געווען מיט ניגוני שמחה, און דער גאנצער ציבור איז אריבער וואונטשן מזל טוב פאר רבינו שליט"א. מען האט פארענדיגט ארום 11:40, אויפן וועג ארויס האט דער רבי אנגעוואונטשן פאר די כלה כנהוג.

דערנאך האט דער רבי געדאווענט מעריב אין א זייטיגן צימער, און ארום 12:00 פארלאזט די זאל אויפן וועג אהיים קיין קרית יואל.

▫️ סאטמארע נייעס 🌴 ▫️

מיטוואך פרשת אח"ק 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען א ברית לבן הנולד אצל ר' שלמה לייב שניצער הי"ו, ווי דער רבי איז געווען סנדק.

דער רבי האט געדאווענט שחרית בהיכל המתיבתא סניף ויואל משה. פארן דאווענען האט דער רבי געלייגט תפילין פאר די בר מצוה בחורים.
- ב"ר יואל ב"ר נחום שמשון וועבערמאן הי"ו.
- ב"ר מרדכי פריעדמאן הי"ו.
- ב"ר יואל הכהן ראזענבערגער הי"ו.
- ב"ר מרדכי דוב מאשקאוויטש הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל כ"ה פסוק א'. דערנאך איז פארגעקומען א לחיים מיט די בר מצוה בחורים בחדרו הפרטי.

נאכן דאווענען האט דער רבי מנחם אבל געווען הרה"ח ר' אברהם שלום לאנדא הי"ו ובניו ע"פ אשתו / אמם ע"ה.

אין די נאכמיטאג שעה'ן איז דער רבי ארויף בהיכל הישיבה סניף ויואל משה ווי דער רבי האט געלערנט מיט א חברותא מתלמידי הישיבה בחדרו הפרטי.

דער רבי האט געדאווענט מנחה ארום 8:30 בביתו נאוה קודש אויף איהעל קט.
דערנאך איז געווען זמני כניסה בקו''פ ביז 12:40 אויפדערנאכט בביתו נאוה קודש.

רבינו שליט''א האט געליינט די תנאים פון די מחותנים.
- הרה"ח ר' אשר אנשיל זאלדאן הי"ו - הרה"ח ר' אלימלך ברא"ל שווארץ הי"ו.
- הרה"ח ר' שמעון ישראל שטיינמעץ הי"ו (וומסב''ג) - הרה"ח ר' יואל יעקב מרדכי טייטלבוים הי"ו.

דער רבי האט געדאווענט מעריב ארום 12:40, און נאך מעריב געמאכט קידוש לבנה פארנט פון ביתו נאוה קודש.

▫️ סאטמארע נייעס 🌴 ▫️

דינסטאג פרשת אח"ק 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית בהיכל המתיבתא סניף עצי חיים - שיעור ג'. פארן דאווענען האט דער רבי געלייגט תפילין פאר די בר מצוה בחורים.
- תאומים בני ר' יואל ווייסמאן הי"ו.
- ב"ר מרדכי היימאן הי"ו.
- ב"ר שמעון משה ניישטיין הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל כ"ה פסוק א'. דערנאך איז פארגעקומען א לחיים מיט די בר מצוה בחורים בהיכל הביהמ"ד.

אין די נאכמיטאג שעה'ן איז דער רבי אריינגעפארן קיין וומסב''ג צו די וועכנטליכע זמני כניסה.

ביים אנקומען אין וומסב''ג אום 7:00 איז דער רבי אריבער צום מעמד קביעות מזוזה פארן בנין החדש והמפואר 'ישיבה לצעירים' נדבת הרבני הנגיד ר' אברהם בראך הי"ו.
דער רבי איז אריין אימעם היכל הביהמ"ד און זיך אומגעקוקט אויף די לימודים מיט א קענטיגע קורת רוח, און דערנאך געדאווענט תפילת מנחה ברוב עם בהיכל הביהמ"ד.

נאך מנחה האט רבינו שליט"א קובע געווען א מזוזה אויפן שער הביהמ"ד און דערנאך ארום געגאנגן און זיך אומגעקערט אינעם גאנצן פראכטפולע בנין אויף אלע שטאקן און צימערן אין באגלייטונג פון בנו הגה"צ אבד''ק וומסב''ג שליט"א, און דערביי געהערט א באריכט פונעם נדבן הבנין הרבני הנגיד ר' אברהם בראך הי"ו מראה''ק.

דערנאך איז פארגעקומען א מסיבת לחיים וחנוכת הבית בהיכל הביהמ"ד, מען האט געזינגן עטליכע ניגונים, און עס האט אויפגעטרעטן דער ראש ישיבה הגה"צ אבד''ק וומסב''ג שליט"א און מקבל פנים געווען רבינו שליט"א, און ארומגערעדט בשבח פונעם נדבן החשוב הנגיד ר' אברהם הי"ו, וויפיל כוחות ער האט אריינגעלייגט אהערצושטעלן אזא שיינעם בנין בדמים תרתי משמע, און בפרט די כוחות וואס ער לייגט אריין א גאנץ יאר להצלחת הישיבה.

דער רבי האט געטרינקן לחיים און אנגעוואונטשן פאר הגה"צ אבד''ק וומסב''ג שליט"א, פארן מנהל הרה"ג ר' הערשל הורוויץ שליט"א, פארן נדבן הרה"ח ר' אברהם בראך הי"ו, און פארן גאנצן ציבור, און דערנאך משמיע געווען דב"ק אויפן פסוק 'דבר אל כל עדת בני ישראל קדושים תהיו' און געטייטשט אז נאר דורך די זכות פון יעקב אבינו קען מען זיך האלטן אין גלות און די עקזיסטענץ פון כלל ישראל אפילו אין די טריפה'נע אמעריקע וואס איז נישט ע"פ דרך הטבע, דער רבי האט ארויסגעברענגט די גרויסע שמחה אז מען קען זיך צוזאמקומען פאר א חנוכת הבית פאר אזא בנין מפואר, וואו די בחורים וועלן ווייטער שטייגן לשם ולתפארת, און ממשיך געווען מיט יסודות'דיגע דברי הדרכה פאר די בחורים, און דערמאנט לשבח פונעם חשוב'ער נדבן הבנין הרבני הנגיד ר' אברהם בראך הי"ו וועלכער האט אויפגעבויט אזא שיינער בנין מפואר פאר די ישיבה, און פון אלע זיינע אנדערע פראיעקטן און בנינים בתוככי קהילתינו הק' אין וומסב''ג וועלכע זענען אהערגעשטעלט אויפן שענסטן און בעסטן פארנעם און זענען אנגעפילט מיט מתפללים און לומדים אויפן העכסטן סטאנדארט. און עקסטער דערמאנט איבער די פרישע פראיעקט פונעם נדבן וועלכער גייט בעז"ה אויפשטעלן ביליגע דירות אין קרית יואל, און דערביי ארויסגעברענגט מיט ווייטאג די אומגעהויער שווערע מצב מיט די דירות אינעם עיר ואם בישראל וויליאמסבורג, און עס איז ממש נישט מעגליך פאר א געווענליכער מענטש צו קויפן א דירה, און אפילו דינגען קאסט אפ א הון תועפות, דער רבי האט ארויסגעברענגט אז אין די ברייטע אמעריקאנער גאס, און אזוי אויך אין ארה"ק, האט מען שוין דורכגעבראכן אז א פארפאלק האט חתונה און ציט זיך תיכף אוועק פון די שטאט פון די עלטערן צוליב די הויכע קאסטן פון פארבלייבן אין די עלטערע שטעט, און כאטש וויליאמסבורג איז טאקע זייער ערליך און הייליג, קומט עס נאכאלץ נישט צו צו קרית יואל ברוחניות, און נישט בגשמיות, רביה"ק בעל דברי יואל זיע''א האט אויפגעשטעלט קרית יואל טאקע פאר וויליאמסבורגער אידן, עס איז געקומען די צייט מען זאל טראכטן אז מען דארף זיך אוועקציען פון דאנעט, און זאגן דעם פסוק 'קומו צאו מן המקום הזה', מען זאל זיך ארויס ציען קיין קרית יואל, וואו עס איז די א שפע פון דירות פאר ביליגע פרייזן, מען זעט אז דער עתיד פון אנ"ש איז אין קרית יואל, און מסיים געווען מיט ברכת קדשו פאר די הנהלת הישיבה און פאר אלע תלמידים, און א ברכה מיוחדת פאר'ן חשוב'ן נדבן. דער רבי האט פארלאזט דעם בנין הישיבה ארום 8:30.

זמני כניסה בקו''פ איז געווען פון 8:40 ביז 12:50 אויפדערנאכט, בביתו נאוה קודש אויף היוז סט.

בעת די זמני כניסה איז פארגעקומען א כתיבת האותיות אינעם ספר תורה וואס ווערט געשריבן דורך הרה"ח ר' חיים הערש מויזקאפף הי"ו און ווערט אריינגעגעבן דעם שבת אח"ק אין ביהמ"ד ברך משה דקהילתינו וומסב''ג, דער רבי האט אריינגעשריבן א אות, געטרינקן לחיים און מאציל געווען מברכת קדשו.

אויך זענען אריין בקו''פ הנהלת כולל שומרי החומות מקבל זיין ברכת הקודש לרגל זייער בעפארשטייענדע דינער השנתי אין וויליאמסבורג, דער רבי האט געהערט א באריכט איבער די לעצטערע פעולות און מאציל געווען מברכת קדשו.

דער רבי האט געדאווענט מעריב ארום 10:00, און דערנאך ווייטער ממשיך געווען אויפנעמען דעם ציבור.

ארום 10:40 איז פארגעקומען א מסיבת לחיים בקו''פ לרגל שמחת קישור החיתון פון נכדו החתן פרע"ח הרב יצחק אייזיק שליט"א בן הגה"צ רב דביהמ"ד בית ברוך שליט"א, עס האט זיך פארמירט א שיינע שמועס איבער דעם גרויסן יחוס פון חתן וכלה, ובסיפורי צדיקים פון די זיידעס, מען האט געמאכט דעם קבלת קנין, און מען האט געזינגען ניגוני שמחה, דער רבי האט געטרינקן לחיים און אנגעוואונטשן פארן חתן, מחותנים, און די בני המשפחה, דערנאך האט דער רבי אנגעוואונטשן פאר די כלה, מען האט געענדיגט ארום 11:00.

מאנטאג פרשת אח"ק 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית בהיכל המתיבתא סניף דברי יואל. פארן דאווענען האט דער רבי געלייגט תפילין פאר די בר מצוה בחורים.
- בן הרה''ג ר' אליעזר יודא מאליק שליט"א רב דביהמ"ד טורי זהב אליק וומסב''ג.
- ב"ר אברהם לעווינגער הי"ו.
- ב"ר בנימין מאיר סיתהון הי"ו.

ביים ליינען איז דער רבי געגאנגען הגבה. און נאכן דאווענען פארגעלערנט דעם טעגליכן תהילים שיעור אויף קאפיטל כ"ה פסוק א'. דערנאך איז פארגעקומען א לחיים מיט די בר מצוה בחורים בחדרו הפרטי.

אין די נאכמיטאג שעה'ן איז דער רבי ארויף בהיכל הישיבה סניף ברך משה ווי דער רבי האט געלערנט מיט א חברותא מתלמידי הישיבה בחדרו הפרטי.

דער רבי האט געדאווענט מנחה ארום 8:25 בביתו נאוה קודש אויף צאנז קט.

נאך מנחה איז דער רבי אריבער באולם כינור דוד צו די סיום מסכת מגילה און ראש השנה דורך מתמידים התמדת התורה. דער רבי האט געטרינקן לחיים און אנגעוואונטשן פארן מנהל הר"ר אליעזר הערשקאוויטש שליט"א און אלע מלמדים און די קינדער און זייערע עלטערן און זיידעס, און משמיע געווען קורצע דב"ק בשבח פון די קינדער וואס געבן אוועק פון די אייגענע צייט צו זיצן און לערנען און מסיים געווען בברכת קדשו.

זמני כניסה בקו''פ איז געווען פון 9:05 ביז 12:10 אויפדערנאכט, בביתו נאוה קודש אויף איהעל קט.

בעת די זמני כניסה איז אריין בקודש פנימה הרב נתן פעלדמאן שליט"א פון הוצאת צוף, אינאיינעם מיט די אייגנטומער פון גנזים אנטיק, און איבערגעגעבן פאר רבינו שליט"א די ניי איבערגעדרוקטע סידור בעל שם טוב וועלכע זיי האבן ארויסגעגעבן, און דערביי געצייגט פארן רבין עטליכע כתבי ידות פון רביה"ק בעל דברי יואל זיע''א, דער רבי האט מעיין געווען דערין א לענגערע צייט און מאציל געווען מברכת קדשו.

רבינו שליט''א האט געליינט די תנאים פון די מחותנים.
- הרה"ח ר' יואל וואלף שווארץ הי"ו - הרה"ח ר' יצחק פאלאטשעק הי"ו.
- הרה"ח ר' יצחק שווארץ הי"ו (וומסב''ג) - הרה"ח ר' שלמה הערש פישער הי"ו.

דער רבי האט געדאווענט מעריב ארום 12:10.

נאך מעריב איז דער רבי אריבער אויף קביעות מזוזה בביתו החדש פון נכדו הרב דוד אלימלך האלבערשטאם שליט"א חתן חדב"ן הגה"צ רב דביהמ"ד אבני צדק שליט"א. עס האט זיך פארצויגן א שיינע שמועס, דער רבי קובע געווען א מזוזה, געטרינקן לחיים און מאציל געווען מברכת קדשו.

▫️ סאטמארע נייעס 🌴 ▫️

זונטאג פרשת אח"ק 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית בהיכל המתיבתא סניף קדושת יואל. פארן דאווענען האט דער רבי געלייגט תפילין פארן בר מצוה בחור ב"ר יעקב בערגער הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל כ"ה פסוק א'. דערנאך איז פארגעקומען א לחיים מיט'ן בר מצוה בחור בחדרו הפרטי.

נאכמיטאג איז דער רבי ארויף בהיכל הישיבה סניף דברי יואל ווי דער רבי האט געלערנט מיט א חברותא מתלמידי הישיבה בחדרו הפרטי.

ארום 7:30 פאר מנחה איז פארגעקומען בביתו נאוה קודש אן אסיפה מיטן וועד קרן הבנין פונעם נייעם מיידל שולע אין בני ברק וואס שטייט שוין בגמר מלאכת הבנוי' און וועט אי"ה געעפענט ווערן ברוב פאר והדר צום נייעם שנת הלימודים בשטומ"צ, און איבער די בעפארשטייענדע נסיעה פון רבינו שליט"א קיין ארה"ק, דער רבי איז איבערגעגאנגן אלע פרטים פונעם בנין, און חשבונות פון די מתנדבים בעם, און מאציל געווען מברכת קדשו.

ארום 8:10 האט דער רבי געדאווענט מנחה בביתו נאוה קודש אויף צאנז קט.

זמני כניסה בקו''פ איז געווען פון 8:40 ביז 11:45 אויפדערנאכט, בביתו נאוה קודש אויף איהעל קט.

רבינו שליט''א האט געליינט די תנאים פון די מחותנים.
- הרה"ח ר' שמעון קרויס הי"ו - הרה"ח ר' זלמן לייב גליק הי"ו.
- הרה"ח ר' פישל כ"ץ הי"ו - הרה"ח ר' וואלף פארקאש הי"ו.

דער רבי האט געדאווענט מעריב ארום 11:45.

▫️ סאטמארע נייעס 🌴 ▫️

שב''ק פרשת תזו"מ 'בצל הקודש' פון כ''ק רבינו הגה''ק שליט''א

ערש''ק פארן זמן הדלקה"נ האט דער רבי משמיע געווען דב"ק חיזוק והדרכה דורך א הוקאפ פאר די הונדערטער אלמנות שיחיו במסגרת שבת מלכתא אינעם ארמון האטעל אין קאנעטיקוט ארגאניזירט דורך הרבנית הצד' תליט"א און אירע חשובע טעכטער שיחיו.

פרייטאג צונאכטס ארום 8:30 איז דער רבי אריינגעקומען אין ביהמ''ד מעוטף בטליתו און צוגעגאנגען צו מנחה. קבלת שבת: הרה"ח ר' שלום יצחק שעהר הי"ו (אנטווערפן).
נאכן דאווענען איז פארגעקומען אן אפיעל פאר מוסדות תורה ויראה עטה"ק ירושלים. מען האט געענדיגט ארום 10:00. דער ציבור איז אריבער זאגן גוט שבת און דער רבי איז אריין לחדרו הפרטי.

ארום 10:30 איז דער רבי אריינגעקומען צום שלחן הטהור בהיכל השלחנות אינאיינעם מיט די תלמידי המתיבתא, און אנגעהויבן כדרכו בקודש שלום עליכם ברגש ובנעימה.
אשת חיל: נכד רבינו הב' ישכר בער טייטלבוים ני"ו בן חדב"ן הגה"צ רב דביהמ"ד ברך משה שליט"א. הגבהת הכוס: הרה"ח ר' ישעי' אשר זעליג אייזנבאך הי"ו (בית שמש).

מיט די זמירות האט רבינו שליט''א מכבד געווען. כל מקדש: הר"ר נחמן בראך שליט"א (בית שמש). מנוחה ושמחה: הרה"ח ר' ישעי' אשר זעליג אייזנבאך הי"ו.

רבינו שליט''א האט געזאגט תורה אויפן מדרש 'לא נתקררה דעתו של איוב עד שראה פרשת אשה כי תזריע' און געטייטשט בדרך דרוש אין די סוגיא פון עשה דוחה לא תעשה.

קה אכסוף: הרה"ח ר' בצלאל טויסיג הי"ו (בית שמש). ברכת המזון: הגה''צ ר' קלמן האלבערשטאם שליט"א רב דביהמ"ד צאנז קר"י.

עובדות וסיפורים די וואך האט רבינו שליט''א דערציילט פון הגה''ק ראפשיצער רב זיע''א וואס די יארצייט געפאלט פרייטאג י"א אייר.

קה רבון עלם: הרה"ח ר' משה
יוסף ווערטהיימער הי"ו (וומסב''ג). די פרישע חתנים זענען אריבער נעמען פירות. אז ביום השביעי: הרה"ח ר' מענדל עקשטיין הי"ו. מען האט געענדיגט ארום 1:20.

וביום השבת קודש

שב''ק אינדערפרי איז דער רבי אריינגעקומען אין ביהמ''ד ארום 9:40. ברכות ופסוקי דזמרה: הרה"ח ר' הערשל פריעד הי"ו (וומסב''ג), צו שחרית איז דער רבי צוגעגאנגען.

הוצאה והכנסה: הרה"ג ר' יואל פריעדמאן שליט"א מו"ץ בקהילתינו הק' מאנסי. פסוקי שמע ישראל: הרה"ח ר' שמעי' קעסלער הי"ו (וומסב''ג).

עליות.
- כהן: הרה"ח ר' משה חיים פריעדמאן הי"ו.
- לוי: ר' יעקב יושע אפפעל הי"ו - דער רבי האט קורא שם געווען לרגל הולדת בתו למז''ט.
- שלישי: הרה"ח ר' שלמה יעקב ניישטאדט הי"ו - דער רבי האט קורא שם געווען לרגל הולדת בתו למז''ט.
- רביעי: ר' אהרן יעקב רייכמאן הי"ו - דער רבי האט קורא שם געווען לרגל הולדת בתו למז''ט.
- חמישי: הרה"ג ר' יחזקאל לאקס שליט"א מו"ץ בקהילתינו הק'.
- שישי: רבינו שליט''א.
- שביעי: הרה"ח ר' בערל שטיין הי"ו.
- אחרון: הרה"ח ר' חיים אלי' טייטלבוים הי"ו.
- מפטיר: הרה"ח ר' אשר אנשיל גאנדל הי"ו.
- הגבה: הרה"ח ר' וואלף אלעזר רייכמאן הי"ו (וומסב''ג).
- גלילה: הרה"ח ר' דוד ווערטהיימער הי"ו.

מוסף: הרה"ח ר' שלמה משה קלאגסברוין הי"ו. פתיחה צו אנעים זמירות: הרה"ח ר' יושע וואלף מיטטעלמאן הי"ו. מען האט געענדיגט ארום 12:30.

ביים מיטאג טיש בביתו נאוה קודש האבן מיטגעגעסן תלמידי המתיבתא סניף עצי חיים בהנהלת הר"ר מרדכי אהרן זאבעל שליט"א, במשך די סעודה האט דער רבי געשמועסט בשיחות קודש ובספורי צדיקים.
מיט די זמירות האט דער רבי מכבד געווען. ברוך ה' יום יום: הב' אהרן צבי לאנדוי ני"ו בן הרה"ג ר' שלום נח שליט"א מווערעצקי פלעטבוש. ברוך קל עליון: הרה''ח ר' יעקב ברמ"ח פריעדמאן הי"ו משגיח בישיבה. שיר היחוד: (כנהוג בין פסח לשבועות) הב' יחזקאל שרגא טייטלבוים ני"ו בן הגה"צ אב"ד סיגוט שליט"א.

רבינו שליט''א האט געזאגט תורה אויפן מדרש לא נתקררה דעתו של איוב און געטייטשט בדרך דרוש אין די סוגיא צו די לילות האבן משלים געווען דעם שיעבוד מצרים.

ברכהמ''ז: דער מנהל הרה"ג ר' מרדכי אהרן שליט"א. מען האט געענדיגט ארום 3:10.

רעוא דרעווין

צו מנחה ושל''ש איז דער רבי אריינגעקומען אין ביהמ''ד ארום 8:25.
- מנחה: הרה"ח ר' ישראל יעקב בראך הי"ו.
- הוצאה והכנסה: הרה"ח ר' יואל בר"א קליינבערגער הי"ו (וומסב''ג).
- כהן: הרה"ח ר' הערשל כ"ץ הי"ו (וומסב''ג).
- לוי: הרה"ח ר' חיים העלער הי"ו (וומסב''ג).
- שלישי: הר"ר יודא הורוויץ שליט"א בן כ"ק אדמו"ר מבית יצחק ספינקא שליט"א.
- הגבה: רבינו שליט''א.
- גלילה: הרה"ח ר' ישראל יעקב פאללאק הי"ו (וומסב''ג).

זמירות ביי של"ס האט דער רבי מכבד געווען. אודה: הרה"ח ר' נח גפן הי"ו. שיר המעלות: הרה"ח ר' משה גאלדשטיין הי"ו.

רבינו שליט''א האט געזאגט תורה אויפן מדרש 'מעשה ברוכל אחד מאן בעי סמי דחיה' און געטייטשט אז כדי עס זאל שרוי זיין א ברכה דארף זיין פון פארדעם אויף וואס עס זאל חל זיין, און אז מען האט נישט איז דורכדעם וואס מען איז באחדות איין איד מיט די אנדערע ווערט גערעכנט איין איד פאר די אנדערע, און עס איז דא א ברכה בגשמיות וברוחניות.

ידיד נפש: הרה"ח ר' שלמה משה קלאגסברוין הי"ו, קל מסתתר: הרה"ח ר' חיים העללער הי"ו. דער רבי האט געבענטשט על הכוס.

מעריב מוצש''ק: הרה"ח ר' אברהם פילאפף הי"ו. נאך הבדלה איז דער ציבור אריבער זאגן א גוטע וואך. מען האט געענדיגט ארום 10:45.

ארום 12:00 איז דער רבי אריבער אינעם אייקאן ביזנעס סענטער אין שכונת ברך משה אויף קביעות מזוזה אינעם נייעם דריטן לאקאציע פון 'קרית יואל פלייש געשעפט', דער רבי האט קובע געווען א מזוזה, און ארום אינעם גאנצן געשעפט און אין די קאך און אין אלע שטובער און דערביי געהערט א באריכט פון הרה''ח ר' חיים הערש אבערלענדער הי''ו און הרה"ח ר' שלמה זלמן ווייס הי"ו מנכ"ל המוסדות, דערנאך איז פארגעקומען א מסיבת לחיים אינעם געשעפט, עס האט זיך פארמירט א שיינער שמועס בעניני שחיטה, מען האט געזינגן עטליכע ניגונים, דער רבי האט געטרינקן לחיים און מאציל געווען מברכת קדשו.

דערנאך איז דער רבי אריבער צום דערנעבנדיגן 'העלאו לייטינג' געשעפט אונטער די אייגנטומערשאפט פון ר' חיים וואלף פריעדמאן הי"ו, דער רבי האט קובע געווען א מזוזה, און זיך אומגעקוקט אינעם געשעפט און מאציל געווען מברכת קדשו פאר די בעלי בתים ובני משפחתם.

דערנאך איז דער רבי ארויף צום נייעם 'חתונה מאלל' געשעפט אינטער די אייגנטומערשאפט פון הרה"ח ר' יואל בר"מ גאלדשטיין הי"ו, דער רבי איז ארום און זיך אומגעקערט אין אלע אפטיילונגען פונעם געשעפט, און דערנאך קובע געווען א מזוזה, דערנאך איז פארגעקומען א מסיבת לחיים, עס האט זיך פארצויגן א שיינע שמועס איבער די הוצאות פון חתונה מאכן, דער רבי האט געטרינקן לחיים און מאציל געווען מברכת קדשו פארן בעה"ב הרה"ח ר' יואל הי"ו פאר אביו הרה"ח ר' משה גאלדשטיין הי"ו און זיין שווער הרה"ח ר' יושע טעללער הי"ו. מען האט געענדיגט ארום 12:50 און דער רבי איז אהיים לביתו נאוה קודש.

▫️ סאטמארע נייעס 🌴 ▫️