Satmara Niyes

דינסטאג אמור 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית אין ישיבה קטנה סניף זרע קודש בהנהלת הר"ר יואל אשר ווידער שליט"א לרגל די הילולא קדישא פון הרה"ק בעל זרע קודש מראפשיץ זיע''א.
ביים אנקומען אין ישיבה איז דער רבי קודם אריין בהיכל הביהמ"ד און זיך אומגעקוקט אויף די לימודים.
פארן דאווענען האט דער רבי געלייגט תפילין פאר די בר מצוה בחורים.
- בן הרה"ג ר' יואל הערש קאהן שליט''א מו"ץ בקהלתינו הק' וומסב''ג.
- בן הר"ר אלטר טייטלבוים שליט''א.
דערנאך האט דער רבי געצינדן לעכט לרגל די יומדה"ק.

נאכן דאווענען איז פארגעקומען א מסיבת לחיים בהיכל הביהמ"ד, מען האט געזינגען עטליכע ניגונים דער רבי האט געטרינקן לחיים און אנגעוואונטשן פאר די בר מצוה בחורים, רמ"י ותלמידי הישיבה, און משמיע געווען דב"ק און ארויסגעברענגט אז דער הייליגער ראפשיצער רב זיע''א פלעגט אריינברענגען א קדושה אין א איד וואס האט מעורר געווען צו תשובה אמיתית, און מסיים געווען בברכת קדשו.

נאכמיטאג איז דער רבי ארויף אין ישיבה סניף ברך משה ווי דער רבי האט געלערנט מיט א חברותא מתלמידי הישיבה בחדרו הפרטי. און ארום 6:00 האט דער רבי געדאווענט מנחה אין ישיבה, פאר מנחה האט דער רבי געצינדן לעכט לרגל די הילולא קדישא.

פארנאכטס איז דער רבי אריינגעפארן קיין וומסב''ג צו די וועכענטליכע זמני כניסה.

ביים אנקומען אין וומסב''ג ארום 8:30 איז דער רבי קודם אריבער אין זאל פון גינת אסתר ווי עס איז פארגעקומען א 'אסיפת שרי האלפים' פאר די אריבער הונדערט עסקנים וועלכע האבן זיך אינטערגענומען אויפצוטרייבן יערליכע גרעסערע סכומים לטובת מוסדות יטב לב צווישן אנ''ש תושבי וומסב''ג און ב"פ.
הגה"צ אבד''ק וומסב''ג שליט"א האט ממשיך געווען מיט זיין דרשה און ארויסגעברענגט די קשר וואס יעדער מאנשי שלומינו דארף שפירן צו מוסדות יטב לב מיט עטליכע פערזענליכע מעשיות איבער די גרויסקייט פון שטיצן מוסדות יטב לב.
דער רבי האט געטרינקן לחיים און אנגעוואונטשן פאר הגה"צ אבד''ק וומסב''ג שליט"א, פאר הגה''צ ר' הערש אלימלך טייטלבוים שליט"א רב דביהמ"ד תפילה למשה ב"פ, און פארן גאנצן ציבור.
דער רבי האט דאן משמיע געווען דב"ק און נאכגעזאגט די ווערטער פון די נעכטיגע אסיפה אין קר"י אז די מטרה פון די אסיפה איז אוועקצושטעלן א פעסטע יסוד פאר מוסדות יטב לב מיט קביעות'דיגע חודש'ליכע נדבות פון אלפי אנ''ש, אויסער די ארבייטער אינעם אפיס וואס טרייבן אויף געלט א גאנץ יאר דארפן צוקומען נאך אסאך עסקנים צו שאפן נייע נדבות יעדער מיט זיינע באקאנטע, דער שווערער דעפיציט פון מוסדות יטב לב איז נישט אז ס'פעלט געלט, נאר ס'פעלט עסקנים, אז ס'וועט צוקומען נייע עסקנים וועט מען קענען דעקן דעם מוסד מדי חודש בחדשו, און מסיים געווען בדברי חיזוק וברכה פאר אלע עסקנים.

דערנאך האבן אויפגעטרעטן דער יושב ראש הר"ר דוד שלמה לאוב שליט"א און הרה"ח ר' שלמה זלמן שפיטצער הי"ו וועלכע האט פארגעשטעלט דעם סדר הקאמפיין.
און אלע עסקנים האבן געהאט די געלעגנהייט אריבערצוגיין פערזענליך איבערצוגעבן דעם שטר התחייבות און דער רבי האט אנגעוואונטשן יעדעם באזונדער.
דער רבי האט פארלאזט די אסיפה ארום 9:10.

זמני כניסה בקו''פ איז געווען פון 9:15 ביז 1:15 אויפדערנאכט בביתו נאוה קודש אויף היוז סט.

בעת די זמני כניסה זענען אריין בקו''פ הנהלת כולל שומרי החומות אפנעמען ברכת הקודש לרגל די בעפארשטייענדער דינער השנתי וועלכע קומט פאר דעם דאנערשטאג אויפדערנאכט - פסח שני אין וויליאמסבורג, דער רבי האט געהערט א באריכט איבער די לעצטערע פעולות, דערביי האט די הנהלה זיך באדאנקט פאר די דרשה וואס דער רבי האט משמיע געווען בהיכל הכולל בעת די נסיעה דעם ווינטער אין ארה"ק קיין אתרא קדישא מירון וואס האט געגעבן גרויס חיזוק פארן כולל, און דער רבי האט זיי מאציל געווען מברכת קדשו.

דער רבי האט געדאווענט מעריב ארום 11:30 און געציילט ספירה פארן עמוד, און דערנאך ווייטער ממשיך געווען אויפנעמען דעם ציבור.

▫️ סאטמארע נייעס 🌴 ▫️

מאנטאג אמור 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית אין ישיבה גדולה סניף דברי יואל. פארן דאווענען האט דער רבי געלייגט תפילין פאר די בר מצוה בחורים.
- ב"ר יואל כייעם הי"ו.
- ב"ר יצחק חננאל טייטלבוים הי"ו.
- ב"ר יצחק אייזיק יעקב גאלדשטיין הי"ו.

ביים ליינען איז דער רבי געגאנגען הגבה, און נאכן דאווענען פארגעלערנט דעם טעגליכן תהילים שיעור אויף קאפיטל ל' פסוק א'. דערנאך איז פארגעקומען א לחיים מיט די בר מצוה בחורים בחדרו הפרטי.

ארום 5:25 איז דער רבי אריבער בהיכל המתיבתא סניף דברי יואל צום דרשת פתיחת הזמן פאר די אריבער 1,300 תלמידי הישיבה, דער רבי האט אנגעהויבן מיט דברי דרוש ואגדה, און דערנאך אריבער צו הדרכה אוןמוסר לקראת זמן החדש, מ'זאל זיך צושטעלן צו די סדרי הישיבה, מעורר געווען איבער גיין אין מקוה יעדן טאג, לערנען ספרי מוסר וחסידות בקביעות, די שיינקייט פון די שבתים אין ישיבה און די דערהויבענקייט פון סעודת רעוא דרעוין, און דערמאנט די תקנות הישיבה נישט צו דרייוון, נישט צו גיין צו חתונות, און נישט פארמאגן א אייגענעם סעלפאון, און געענדיגט מיט חיזוק בעניני השקפה, און אויף אויסצוניצן די ימי הבחרות, איבער די זכי' וואס די בחורים האבן צו לערנען אין די ישיבה פון רבותיה"ק זיע''א און מסיים געווען מיט דברי ברכה. מען האט געענדיגט ארום 6:15.
נאך די דרשה האט דער רבי געדאווענט מנחה בהיכל הישיבה, מען האט געענדיגט ארום 6:40.

ארום 8:10 איז דער רבי אריבער אין די זאלן פון גינת קליין צום סיום דורך מתמידים אהבת התורה שע"י תלמידי כתה ח' פון אלע סניפי מוסדותינו הק', עס האט אויפגעטרעטן דער מנהל המתמידים הר"ר ישראל זאב האלפערט שליט"א.
דער רבי האט געטרינקן לחיים און אנגעוואונטשן פאר די מלמדים און פאר אלע קינדער און משמיע געווען דב"ק און געזאגט אז מען ליינט די וואך די פרשה פון אלע מועדים, ווען מען מאכט א סיום מסכת איז אויך א יו"ט, 'עבידנא יומא טבא דרבנן' און דאס איז מען מתפלל 'יגיענו למועדים ולרגלים אחרים' אז מען זאל מסיים זיין נאך מסכתות און עס זאל זיין נאך מועדים, און מסיים געווען מיט ברכת קדשו.
דער רבי האט פארלאזט די זאל ארום 8:25.

זמני כניסה בקו''פ איז געווען פון 8:30 ביז 12:30 אויפדערנאכט בביתו נאוה קודש אויף איהעל קט.

ארום 9:50 איז דער רבי צאריבער לביתו נאוה קודש אויף צאנז קט. ווי עס איז פארגעקומען א 'אסיפת שרי האלפים' פאר די אריבער הונדערט עסקנים וועלכע האבן זיך אינטערגענומען אויפצוטרייבן יערליכע גרעסערע סכומים לטובת מוסדות יטב לב צווישן אנ''ש תושבי קר"י.
עס האבן אויפגעטרעטן הרה"ח ר' שלמה זלמן שפיטצער הי"ו וועלכע האט פארגעשטעלט די סדר הקאמפיין, און הרה"ח ר' שלמה זלמן ווייס הי"ו מגדולי העסקנים.
דער רבי האט געטרינקן לחיים און אנגעוואונטשן פאר הגה"צ ר' שלמה רובין שליט"א אב"ד ציעשנוב קר"י, עסקנים און פארן גאנצן ציבור, און משמיע געווען דב"ק איבער די חשיבות פון מוסדות יטב לב ביי רבותיה"ק זיע''א און רצון קדשו אז די מוסד זאל זיך אוועקשטעלן אויף א פעסטע יסוד זאגענדיג אז מען האלט מיט די לעצטערע יארן בעפאר די ימים טובים ווי מען דארף צוזאמשטעלן די לעכער וואס בלייבן איבער און הרה"ח ר' מאיר הירש הי"ו ארבעט בלו"נ דאס צו שאפן, דער רבי האט אויסגעפירט אז מען ליינט אין די יעצטיגע פרשה די פרשה פון די מועדים דאס קומט זאגן אז מען שטייט יעצט ביי די ימים טובים און מען דארף אוועקשטעלן א פעסטע יסוד אז די מוסד זאל זיך קענען דעקן חודשליך און מען זאל נישט דארפן קומען מיט אן אלארעם בעפאר די ימים טובים, דער רבי האט מסיים געווען מיט דברי חיזוק פאר די עסקנים וועלכע גרייטן זיך צו א גרויסע קאמפיין צו שאפן קביעותדיגע גרעסערע נדבות פון אנשי שלומינו און מסיים געווען מיט ברכות לרוב פארן גאנצן ציבור.

דערנאך האבן אלע עסקנים געהאט די געלעגנהייט אריבערצוגיין פערזענליך איבערגעבן די שטר התחייבות און דער רבי האט אנגעוואונטשן יעדעם באזונדער, ארום 10:15 האט דער רבי פארלאזט די אסיפה און איז צוריקגעגאנגען לביתו נאוה קודש אויף איהעל קט.

ארום 10:20 איז דער רבי אראפ אין די זאלן בביתו נאוה קודש ווי דער רבי האט געליינט די תנאים פון די מחותנים.
- הר"ר יואל פאסטערנאק שליט"א און הר"ר יעקב שלמה רובינפעלד שליט"א.
- הרה"ח ר' נחום קלאגסברוין הי"ו און הרה"ח ר' יואל פייערווערקער הי"ו.

בעת די זמני כניסה איז געווען אויף א באזוך בקו''פ האדמו"ר מטאלנא בית שמש שליט"א, עס האט זיך פארצויגן א שיינע שמועס איבער הרה"ק רבי דודל מטאלנא ז"ל וואס די יארצייט איז געפאלן נעכטן מאנטאג י' אייר, דער רבי האט אים מכבד געווען מיט לחיים און מאציל געווען מברכת קדשו.

אויך איז אריין בקו''פ הגה"צ רבי חיים מאיר קאהן שליט"א אב"ד תולדות אברהם יצחק ביתר, בן כ"ק אדמו"ר מתולדות אברהם יצחק שליט"א, עס האט זיך פארצויגן א שיינע שמועס איבער די באזוך פון חותנו הרה"צ רבי מאיר בראנדסדארפער ז"ל אינעם בית השחיטה אין קרית יואל, און דער רבי האט אים מאציל געווען מברכת קדשו.

דער רבי האט געדאווענט מעריב ארום 12:30. פאר מעריב האט דער רבי געצינדן לעכט לרגל די הילולא קדישא פון הגה''ק בעל זרע קודש מראפשיץ זיע''א און נאך מעריב געציילט ספירה פארן עמוד.


▫️ סאטמארע נייעס 🌴 ▫️

זונטאג אמור 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית אין ישיבה גדולה סניף קדושת יואל. פארן דאווענען האט דער רבי געלייגט תפילין פאר די בר מצוה בחורים:
- ב"ר יואל בר"ב פעלדמאן הי"ו.
- ב"ר יואל ב"ר יחזקאל ראזענבערג הי"ו.

נאכן דאווענען האט דער רבי פארגעלערנט דעם טעגליכו תהילים שיעור, און ארומגערעדט איבער דעם מצב המלחמה אין ארה"ק, דער רבי האט נאכגעזאגט א חתם סופר אז אויב א איד הרג'עט א גוי און מען פירט זיך נישט אויף כהוגן דארף מען ח"ו באצאלן מיט אידישע נפשות רח"ל, ביים חורבן ביהמ"ק איז געווען שפך חמתו על עצים ואבנים און עס האט זיך נישט אויסגעפעלט קיין אידישע נפשות, יעצט בזמנינו אלה ווען די מדינה הטמאה הרג'ט אויס פולע נפשות פון די גוים איז מען זיך דא צו פרייען אבער ווער ווייסט מיט וואס מען גייט דארפן באצאלן אויף דעם, און אויסגעפירט מיט א מליצה ישרה פון זקינו הרה"ק רבי אלעזר ניסן זיע''א אויף 'כל דור שלא נבנה בימיו כאילו נחרב בימיו' אויב איז מען זיך מצער אויף חורבן ביהמ"ק איז עס יעדע יאר כאילו דאס ביהמ"ק איז פון פריש חרוב געווארן און עס איז דא א כפרה אויף כלל ישראל יעדעס יאר און עס פעלט זיך נישט אויס קיין אידישע נפשות.
דערנאך איז פארגעקומען א לחיים מיט די בר מצוה בחורים בחדרו הפרטי.

ארום 2:30 איז דער רבי אריבערגעפארן קיין שיכון סקווירא ווי דער רבי איז אנגעקומען ארום 3:00 אין שטוב פון גיסו כ"ק אדמו"ר מסקווירא שליט"א אויף א אסיפה נחוצה אינאיינעם מיט כ"ק אדמו"ר מסקווירא שליט"א און כ"ק אדמו"ר מויזניץ מאנסי שליט"א, און עטליכע גדולי עסקני יהדות החרדית און פאליטישע באאמטע ווי מען האט א לענגערע צייט דן געווען אויף פארשידענע עניני הכלל העומדים על הפרק. מען האט געענדיגט ארום 4:10, און דער רבי איז אהיימגעפארן לביתו נאוה קודש אין קר"י.

ארום 7:15 האט דער רבי געדאווענט מנחה בביתו נאוה קודש אויף צאנז קט.

זמני כניסה בקו''פ איז געווען פון 8:20 ביז 12:00 אזייגער אויפדערנאכט בביתו נאוה קודש אויף איהעל קט.

דער רבי האט געדאווענט מעריב ארום 9:40 און נאך מעריב האט דער רבי געמאכט קידוש לבנה פארנט פון ביתו נאוה קודש.

ארום 10:30 איז דער רבי אראפ אין די זאלן בביתו נאוה קודש ווי דער רבי האט געליינט די תנאים פון די מחותנים.
- הרה"ח ר' אברהם משה לאנדא הי"ו און הרה"ח ר' יואל בר"ע הירש הי"ו.
- הרה"ח ר' יוסף סרוגא הי"ו און הרה"ח ר' אברהם יצחק כאירה הי"ו.

▫️ סאטמארע נייעס 🌴 ▫️