Satmara Niyes

ורוח הקודש אומרת כן ירבה וכן יפרוץ

היינט פארמיטאג איז פארגעקומען די ''מעמד קביעת מזוזה ומסיבת לחיים'' פארן בנין הבית רחל בנין ריספלער החדש במוסדותינו הק' וויליאמסבורג, וועלכע איז בשעטו"מ געעפענט געווארן און אריין אין באנוץ נאך לאנגע יארן פון עגמת נפש. דער מעמד איז באשיינט געווארן דורך כ"ק מרן רבינו הגה"ק שליט"א.

רבינו שליט"א האט קובע געווען די מזוזה, און דערנאך אפגעראכטן די מסיבת לחיים. דער רבי שליט''א האט געוואונטשן פארן ציבור ובפרט פאר הרבני הנגיד ר' פישל ריספלער הי"ו. עס האבן אויפגעטרעטן הגה"צ אבד"ק ור"מ וומסב"ג שליט"א און די מנהל הרה''ג ר' בנימין ליכטענשטיין שליט"א. רבינו שליט"א האט משמיע געווען דברות קודש. בתו"ד האט רבינו שליט"א ארומגערעדט בשבח פונעם נדבן הבנין הרבני הנגיד ר' מאיר זעליג ריספלער ז"ל ראה"ק דקהלתינו הק', און ארויסגעברענגט די גרויסע טובה וואס עס איז פאר די נשמה ווען מען איז מחנך א בנין וואס מען האט זיך אזויפיל געמוטשעט, און די זכי' אז אזוי פיל מיידלעך ווערן נתחנך אין זיינע בנינים. רבינו שליט''א האט מסיים געווען מיט גאר ווארימע ברכות הקודש פאר די משפחה וואס זענען הולכים בדרכיו ועוד ידיהם נטוים לרומם קרן קהילתנו הק'.

נאכדעם איז רבינו שליט"א ארומגעגאנגען אינעם בנין ווי דער רבי האט זיך אומגעקוקט אויף אלע שטאקן, אין די עסן זאלן און אין די כתות. ביים ארויסגיין האט דער רבי שליט''א גאר ווארעם געוואונטשן פאר די חשובע מרת ריספלער תחי' און זיך אויסגעדריקט "אז דאס איז די שענסטע כבוד וואס מען קען טוהן לטובת הנשמה".

בורא עולם בקנין השלם זה הבנין

▫️ סאטמאר'ע נייעס 🌴 ▫️

מאנטאג נצבים ב' סליחות בצל הקודש פון כ"ק מרן רבינו הגה"ק שליט"א

ארום 5:45 איז רבינו שליט''א אריין געקומען צו אמירת סליחות בבית מדרשינו הגדול בקר"י. בעל תפלה איז געווען הרה"ג ר' בערל גלאנץ שליט"א מבארדיוב קרית יואל. מען האט גענדיגט ארום 6:30.

רבינו שליט"א האט געדאווענט שחרית בבית מדרשינו הגדול בקר"י. פארן דאווענען האט רבינו שליט''א תפילין געלייגט פאר די פאלגענדע בר מצוה בחורים:
ב''ר יושע קאהן הי''ו.
ב''ר משה נסים מזרחי הי''ו.

נאכן דאווענען האט רבינו שליט"א געבלאזן שופר, און ביי תהילים געזאגט 15 קאפיטלעך כנהוג.

נאכדעם איז פארגעקומען א מסיבת לחיים מיט די בר מצוה בחורים בחדרו הפרטי.

נאכן מסיבת לחיים האט רבינו שליט''א קובע מזוזה געווען אויף חדרו הפרטי החדש בביהמ"ד הגדול, נדבת לבו פון הרבני הנגיד ר' שמואל זאנוויל ווערטהיימער הי"ו.

נאכמיטאג ארום 4:00 ביים אנקומען אין בארא פארק איז רבינו שליט"א געווען מנחם אבל זיין משפחת הגה"צ ר' חיים יצחק אייזיק טייטלבוים זצ"ל אב"ד סלאטפינא נכד רבותינו הק', צווישן זיי בנו הרה"ג ר' ליפא ט"ב שליט"א דומ"ץ דקהלתינו הק' באנטווערפן. עס איז פארפירט געווארן א שיינע שמועס איבער צדיקי ומנהגי בית סיגוט.

ארום 4:30 איז רבינו שליט"א אנגעקומען בבית האכסניא אין שטוב פון הרה"ח ר' משה כהנא הי"ו ווי עס איז געווען זמני כניסה בקודש פנימה לקראת ימי הרחמים והרצון פאר אנ"ש אין שטאט, ווי עס זענען אריין שווערע הונדערטער אידן צווישן זיי צענדליגע רבנים פון שטאט, וואס האט זיך פארצויגן פאר קרוב צו 9 שעה פון 4:30 ביז 1:30.

ביי די זמני כניסה האט -ווי שוין געמאלדן- באזוכט ביי רבינו שליטא הגה"צ ר' בנציון הכהן שטראסער שליט"א אבד"ק נייטרא בארא פארק, ווי רבינו שליט"א האט אים איבערגעגעבן א מתנה א נייער "טלית" וואס די ציצית איז געמאכט געווארן פון די וואל וואס רבינו שליט"א האט אליינס געשניטן און מקיים געווען די מצות מתנת כהונה ביים היסטארישען מעמד ראשית הגז פארגאנגענעם חוה"מ פסח.

ארום 2:00 איז רבינו שליט"א אנגעקומען בביתו נאוה קודש אין וויליאמסבורג.

▫️ סאטמאר'ע נייעס 🌴 ▫️

מארגן דינסטאג וועט כ"ק מרן רבינו הגה"ק שליט"א אריינקומען צו אמירת סליחות ארום 5:45 בבית מדרשינו הגדול בוויליאמסבורג.

רבינו שליט"א וועט דאווענען תפילת שחרית בבנין התלמוד התורה "בנין ישעי זאב לעוו" אינאיינעם מיט תלמידי כתה ט' מכינה לישיבה קטנה. נאכן דאווענען וועט פארקומען א מסיבת לחיים ווי רבינו שליט"א וועט משמיע זיין דברות קודש פאר די בחורים.

נאכדעם וועט רבינו שליט"א באזוכען די פראכטפולע נייע איבערגעבויעטע אולמי פרענקל שע"י מוסדותינו הק' וועלכע איז פארענדיגט געווארן לשם ולתפארת.

נאכמיטאג וועט כ"ק מרן רבינו הגה"ק שליט"א באשיינען די "מעמד קביעות מזוזה" פאר די פראכטפולע בנין בית רחל 'בנין ריספלער החדש' במוסדותינו הק' וויליאמסבורג, וועלכע איז בשעטו"מ היינט געעפענט געווארן און אריין אין באנוץ נאך לאנגע יארן פון עגמת נפש.

אויפדערנאכט וועט זיין זמני כניסה בקודש פנימה ביי רבינו שליט"א להיפקד בדבר ישועה ורחמים לקראת הימי הרחמים והרצון פאר אנ"ש תושבי וויליאמסבורג פון 5:00 ביז 10:00.

הצלחה רבה און פועל'טס אלעס גוטס

▫️ סאטמאר'ע נייעס 🌴 ▫️

זונטאג נצבים א' סליחות בצל הקודש פון כ"ק מרן רבינו הגה"ק שליט"א

במוצאי מנוחה קדמנוך תחילה זונטאג פארטאגס 5:18 איז רבינו שליט"א אריינגעקומען צו אמירת סליחות בבית מדרשינו הגדול בקרית יואל, ווי דער ריזן ביהמ"ד איז געווען מלא על כל גדותיו עד אפס מקום, אלע שטיבלעך און פאלישען הולוועיס און דורכגענג, מיט שווערע רבבות אידן וואס זענען געקומען זאגן די ערשטע סליחות במחיצת הקודש.

רבינו שליט"א האט יורד געווען לפני התיבה בבכיות נוראות, מעוטף אינעם טלית און קאפל פון רבינו הקדוש בעל דברי יואל זי"ע, געברענגט דורך הרה"ח ר' משה פאלקאוויטש הי"ו, און פארגעזאגט אין א סליחות פון רביה"ק בעל דברי יואל זי"ע געברענגט דורך הרה"ח ר' שלמה זלמן שטיין הי"ו. מען האט געענדיגט ארום 6:20.

נאך סליחות האט זיך געזעגענט הגה"צ אבד"ק ור"מ קהלתינו מאנטשעסטער שליט"א, וועלכע האט געוויילט אויף שבת און א' סליחות בצל הקודש.

רבינו שליט"א האט געדאווענט שחרית בבית מדרשינו הגדול בקר"י. פארן דאווענען האט רבינו שליט''א תפילין געלייגט פאר די פאלגענדע בר מצוה ב"ר מתתי' אירגאס הי''ו.
ב"ר מרדכי לאנדא הי''ו.
ב"ר אברהם יושע גלויבער הי''ו.

נאכן דאווענען איז רבינו שליטא געווען אויף די באזוך אין בית השחיטה המהודרת.

אויפדערנאכט איז געווען זמני כניסה בקודש פנימה פון 5:30 ביז 10:30.

נאך מעריב איז אריבערגעקומען צו רבינו שליט"א הגה"צ ר' מענדל ווערצבערגער שליט"א דומ"ץ דקהלתינו הק' במאנטריאל, אפנעמען ברכות קדשו לרגל די חתונה פון בנו החתן למז"ט וועלכע איז פארגעקומען פארגאנגענע וואך, ווי רבינו שליט"א האט אים ווארעם אנגעווינטשן.

▫️ סאטמאר'ע נייעס 🌴 ▫️