סאטמארע נייעס

באריכט ביקור המרומם ומסע הקודש פון כ''ק מרן רבינו הגה''ק שליט''א קיין מאנטרעאל, קאנאדא - חלק ז'

מאנטאג פרשת תולדות

ארום 10:00 איז רבינו שליט''א אריינגעקומען צו תפילת שחרית אין ביהמ"ד הגדול, אינאיינעם מיט די רבני ולומדי כוללינו.

ביים ליינען האבן עולה געווען, כהן: ר' יואל קאהן הי"ו, לוי: ר' לייבוש בר"ח לעווי הי"ו, שלישי: רבינו שליט"א, הגבה: הרה"ח ר' יצחק פרענקל הי"ו, גלילה: ר' הערשל קליין הי"ו.

נאכן דאווענען איז פארגעקומען בבית האכסניא א מסיבת 'פת שחרית' פאר די הנהלת הכולל וראשי החבורות, עס האט אויפגעטרעטן דער מנהל הכולל הרה"ג ר' יודל שטערן שליט"א, און ארויסגעברענגט בשבח פון די הנהלת הכולל וואס געבן אוועק פון זיך להצלחת הכולל בגשמיות וברוחניות, די עסקני הכולל האבן איבערגעגעבן פארן רבין אז לאור די קריאת הקודש פונעם רבי'ן צו עפענען א כולל בוקר ללימוד התורה באשמורת הבוקר האט הרבני הנגיד ר' יעקב זוסמאן סופר הי"ו זיך אינטערגענומען די הוצאת הכולל לע"נ אביו הרה"ח ר' שמואל בנימין ע"ה, דער רבי האט געטרינקן לחיים און מאציל געווען מברכות קדשו, און דערנאך פארטיילט א 'לעדערנע סידור' בחתי"ק פאר די ראשי החבורות און הנהלת הכולל.

פארמיטאג ארום 1:15 איז רבינו שליט''א אנגעקומען צום כולל אברכים בהיכל בית מדרשינו הגדול, דער רבי האט זיך ארומגעדרייט צווישן די לומדים און זיך אומגעקוקט אויף די לימודים מיט א שטארקע קורת רוח, דערנאך איז פארגעקומען א מסיבת לחיים ווי דער רבי האט געגעבן א שיעור אין די סוגיא פון עד אחד נאמן באיסורין וואס מען לערנט יעצט אין כולל, און דערנאך ממשיך געווען בדברי הדרכה פאר די כולל אינגעלייט, און צווישן אנדערע ארויסגעברענגט איבער אויפשטיין פארטאגס לערנען פארן דאווענען, און משבח געווען די בשורה מרנינה אז אין א בחינה פון טרם יקראו ואני אענה איז שוין דא א נדבן פאר'ן נייעם כולל בוקר.

נאך די דב"ק האט דער רבי געטרינקן לחיים, און אנגעוואונטשן פאר די רבני ולומדי הכולל. מען האט געענדיגט ארום 2:15.

ביים ארויסגיין איז רבינו שליט''א אראפ אינעם אינטערשטן שטאק פון ביהמ"ד אין באגלייטונג פון הרה"ח ר' אברהם מאיר ווערצבערגער הי"ו בריח התיכון פון קהלתינו הק', דער רבי האט זיך אומגעקוקט אינעם רחבות'דיגע 'היכל התורה' און אינעם פראכטפולע 'מקוה מפוארה'.

דערנאך איז רבינו שליט''א אריבער בבית הנגיד ר' מעכיל ראזענבערג הי"ו, וועלכע האט אוועקגעגעבן זיין שטח אויפצושטעלן דעם ריזן שאטער פאר די דערהויבענע טישן און מעמדים, דערביי האט ר' מעכיל הי"ו געצייגט פארן רבין פארשידענע היסטארישע כתבי ידות פונעם נודע ביהודה און נאך, אין וועלכע דער רבי האט מעיין געוועהן א לענגערע צייט, און געגעבן במתנה פאר רבינו שליט"א א לעדערנע סעט פון פריש געדריקטע חידושי נודע ביהודה, דער רבי האט געטרינקן לחיים ומאציל געווען מברכות קדשו.

נאכמיטאג זענען אריבערגעקומען בקו''פ בבית האכסניא בחורי ישיבה קטנה סקווירא מאנטרעאל, דער רבי האט פארהערט די בחורים אויף די לימודים, און געגעבן א שמועס פאר די בחורים, און מאציל געווען מברכות קדשו.
שפעטער זענען אריבערגעקומען די עלטערע כתות פון ת"ת סקווירא מאנטרעאל, די קינדער זענען אריבער שלום נעמען, און דער רבי האט משמיע געווען דברי הדרכה וברכה.

ארום 4:20 האט דער רבי געדאווענט מנחה בבית האכסניא.
נאך מנחה איז געווען אויף א ביקור גומלין הגה"צ ר' יונתן בנימין ווייס שליט"א גאב"ד מאנטריאל, עס האט זיך פארמירט א שמועס בדברי תורה וחסידות, דער רבי האט אים מכבד געווען מיט לחיים און מאציל געווען מברכות קדשו.

ארום 5:15 איז געווען זמני כניסה בקודש פנימה פאר אנ"ש תושבי מאנטרעאל וואס זענען אריין לויט א פאראויס באשטימטע סדר און האט זיך געצויגן ביז ארום 8:30.

בעת די זמני כניסה איז געווען אויף א ביקור גומלין כ"ק אדמו"ר מוויזניץ מאנטריאל שליט"א, עס האט זיך פארמירט א שיינע שמועס בסיפורי צדיקים, דער רבי האט אים מכבד געווען מיט לחיים און מאציל געווען מברכות קדשו.
נאך די זמני כניסה איז פארגעקומען בבית האכסניא אן אסיפה פון הנהלת קהלתינו הק' במאנטרעאל, ווי מען האט דן געווען פארשידענע ענינים, בנוגע התאחדות אברכים, תפקיד הגבאים אין ביהמ"ד, בנוגע די מורי הוראה, און דאס עפענען דעם בית הוראה, און נאך פארשידענע ענינים בנוגע דער עתיד פון קהלתינו הק', רבינו שליט''א האט געגעבן פארשידענע הוראות און הדרכה וכו', און מאציל געווען מברכות קדשו.

דערנאך איז פארגעקומען א ענגע אסיפה מיט די מורי הוראה, וועלכע רבינו שליט"א האט ממנה געווען זיי זאלן עומד זיין לשרת בקודש ולהורות את דבר ה' זו הלכה אינעם נייעם בית הוראה דקהלתינו הק' תחת פיקוח הרה''ג דומ"ץ קהלתינו שליט"א.
די חשובע תלמידי חכמים מובהקים ויראי ה', ממובחרי קהלתינו הק', ה"ה הרה"ג ר' יואל אשר פישער שליט"א, הרה"ג ר' אפרים זלמן מרגליות שליט"א, הרה"ג ר' חיים אלעזר הירשפעלד שליט"א.
רבינו שליט"א האט דערביי געגעבן פארשידענע הוראות און הדרכה און מאציל געווען מברכת קדשו פאר די נייע דיינים שליט''א.

איידערן פארלאזן דעם בית האכסניא האט רבינו שליט''א זיך באדאנקט פארן בעל אכסני' הרבני הנגיד ר' משה ישעי' ווערצבערגער הי''ו מראה''ק, ובני ביתו, און אים ווארעם געווינטשן ברכות לרוב.

ארום 9:10 האט רבינו שליט''א פארלאזט בית האכסניא אויפן וועג צום לופטפעלד, און באגלייטונג בשירה ובזמרה פון אנ''ש תושבי מאנטרעאל וועלכע האבן זיך שווער געזעגענט, מיטנעמענדיג די געהויבענע טעג מלא חיזוק והדרכה, וואס וועט וועט לאנג געדענקט ווערן און באגלייטן אנ''ש תושבי מאנטרעאל.

אינטערוועגענס צום עירפארט האט זיך רבינו שליט''א אפגעשטעלט אינעם ביוראו פון הנגיד בנש''ק הר''ר יואל יודא רובינפעלד הי"ו (וומסב''ג), דער רבי האט קובע מזוזה געווען, און דערנאך איז פארגעקומען א מסיבת לחיים, עס האט אויפגעטרעטן הר''ר יואל יודא הי"ו און דער רבי האט משמיע געווען קורצע דברי הדרכה פאר די ארבייטער, געטרינקן לחיים און מאציל געווען מברכות קדשו.

ארום 9:50 האט זיך דער רבי ארויסגעלאזט אויפן וועג צום YUL לופטפעלד, ווי מען איז אנגעקומען ארום 10:05, און ארום 10:25 האט זיך די פריוואטע פליגער געהויבן אויפן וועג צום טוטער-בארא לופטפעלד.
ארום 11:15 האט די פליגער געלאנדעט, נאך עטליכע מינוט האט דער רבי געדאווענט תפילת מעריב אינעם לופטפעלד.
ארום 11:50 האט זיך דער רבי ארויסגעלאזט אויפן וועג לביתו נאוה קודש אין קר"י, מען איז אנגעקומען ארום 12:30, ווי דער רבי איז אפגעווארט געווארן בשירה וזמרה.

בזמן שהצדיק בעיר הוא הודה הוא זיוה והוא הדרה

▫️ סאטמאר'ע נייעס 🌴 ▫️

באריכט ביקור המרומם ומסע הקודש פון כ''ק מרן רבינו הגה''ק שליט''א קיין מאנטרעאל, קאנאדא - חלק ו'

זונטאג פרשת תולדות

ארום 9:45 איז רבינו שליט''א אריינגעקומען צו תפילת שחרית אין ביהמ"ד הגדול, אינאיינעם מיט אנ''ש תושבי מאנטרעאל.

מיטאג ארום 1:00 איז געווען זמני כניסה בקו''פ פאר אנ''ש תושבי מאנטרעאל וואס זענען אריין לויט א פאראויס באשטימטע סדר און האט זיך געצויגן ביז ארום 3:15.

בעת די זמני כניסה איז אריבערגעקומען דער מעיאר פון שטאט מאנטרעאל וועלכע האט שטארק ארויסגעהאלפן צו באקומען די פערמיטן פארן ביהמ"ד, דער רבי האט זיך שטארק באדאנקט און געווינטשן ברכת קדשו.

נאך די זמני כניסה האט רבינו שליט''א געדאווענט מנחה בבית האכסניא.
ארום 4:15 איז רבינו שליט''א אנגעקומען אין קרית טאהש אויף א באזוך ביי כ"ק אדמו"ר מטאהש שליט"א, עס האט זיך פארצויגן א שיינער שמועס בסיפורי צדיקים און איבער די הרחבת גבולי הקדושה אין קרית טאהש, האדמו"ר מטאהש שליט"א האט מכבד געווען דעם רבי'ן מיט לחיים און דער רבי האט מאציל געווען מברכות קדשו, און דערנאך האט האדמו''ר מטאהש שליט''א געבעטן רבינו שליט''א צו רעדן פריוואט פאר עטליכע מינוט, אויפן וועג ארויס האט דער טאהשער רבי שליט"א באמערקט פאר רבינו שליט"א אז אויף דעם מקום פונעם באזוך פראוועט דער טאהשער רבי שליט"א שוין די לעצטע צוויי יאר די סעודות ליל ויום שב"ק מיט די תלמידי הישיבה, און דערנאך האט דער טאהשער רבי שליט"א ארויסבאגלייט דעם רבי'ן ביזן קאר.

ארום 5:15 איז רבינו שליט''א צוריק אנגעקומען אין מאנטרעאל און תיכף צוגעפארן צום בנין בית מדרשינו הגדול צו די גרויסארטיגע חגיגת הכנסת ס''ת אריינגעגעבן דורכ'ן בונה ומקים הביהמ''ד הרבני הנגיד ר' יעקב זוסמאן סופר הי"ו לע"נ אביו הרה"ח ר' שמואל בנימין ע"ה מיקירי תושבי מאנטרעאל, דער רבי האט איבערגענומען די ס''ת פונעם נדבן און אפגעראכטן די ריקודי קודש בהתלהבות אש פאר א לענגערע צייט, און מכבד געווען דעם נדבן אריינצולייגן די ס''ת אין ארון קודש, און דערנאך פארגעזאגט לדוד מזמור כנהוג.
נאכן מעמד האט דער רבי געדאווענט מעריב בהיכל הביהמ"ד.

נאך מעריב איז רבינו שליט''א אריבער בבית הרה"ח הישיש ר' מאיר יודא פעלזן הי"ו וועלכע האט מנדב געווען א גרויסע סכום פארן ביהמ"ד, עס האט זיך פארמירט א שיינע שמועס איבער זכרונות פון הרה"ק ר' שלום אליעזר מראצפערט זיע"א, דער רבי האט געטרינקן לחיים און מאציל געווען מברכות קדשו.

פון דארט איז רבינו שליט''א אריבער אויף א באזוך ביי הרה"ג ר' מענדל ווערצבערגער שליט"א דומ"ץ קהלתינו הק', עס האט זיך פארמירט א שיינע שמועס איבער שאלות בהלכות עירובין, און ארומגערעדט איבער די נסים וואס מען האט געהאט דעם פארלאפענעם זומער במחנה הקיץ קרית ברך משה קאנאדא, און נאך, דער דיין שליט"א האט מכבד געווען דעם רבי'ן מיט לחיים און דער רבי האט מאציל געווען מברכות קדשו.

בבית האכסניא זענען אריין בקודש פנימה די עסקנים פון התאחדות אברכים ווי מען איז איבערגעגאנגען די פילצאליגע פעולות פאר די פרישע אינגעלייט להגדיל תורה ולהאדירה, און דער רבי האט מאציל געווען מברכות קדשו.
ארום 9:30 איז רבינו שליט''א אנגעקומען צו די זאלן פונעם קראון פלאזא האטעל, ווי עס איז פארגעקומען דער גרויסארטיגער 'מעמד חנוכת הבית - וכינוס אנ''ש תושבי קאנאדא' אויף א גאר פראכטפולע און עלעגאנטער פארנעם, און איז געפראוועט געווארן אינאיינעם מיט די סעודה לגומרה של תורה, בהשתתפות פון די הונדערטער אנשי שלומינו תושבי מאנטרעאל און קרית טאהש, און פילצאליגע געסט וועלכע זענען זיך געקומען מיטפרייען בשמחת קהלתינו הק' ובשמחת פונעם חשובן בונה ומקים הביהמ''ד ונדבן הס"ת הרבני הנגיד ר' יעקב זוסמאן סופר הי"ו.

עס האט אויפגעטרעטן דער יושב ראש הרה''ג ר' יוסף משה אונסדארפער שליט"א מגי''ש בקהלתינו מאנטרעאל בן הגה"צ אבד''ק ראשית חכמה שליט"א, וועלכע האט ארויסגעברענגט די שמחה און התרגשות פון אנ''ש ווען מען איז זוכה צו דעי מאמענט, און ארומגערעדט בשבח קהלתינו הק' מיום הווסדה.

לזכרון פון הרה"ח ר' שמואל בנימין סופר ז"ל האט אויפגעטרעטן זיין שוואגער הרה"ג ר' וואלף לאנדא שליט"א מנהל ישיבה קטנה סניף רב טוב בקר"י, און עס איז פארגעזינגען געווארן דורך ר' בנציון וועבערמאן הי"ו באגלייט מיט די זמרה קווייער, ספעציעלע חרוזים לכבוד המאורע איבער די השתלשלות פון 'סאטמאר מאנטרעאל'.

ביים מעמד האבן זיך משתתף געווען - צווישן די פילע רבנים ודיינים פון קאנאדא -, כ"ק אדמו"ר מוויזניץ מאנטריאל שליט"א און כ"ק אדמו"ר מטאהש שליט"א, דער רבי האט מכבד געווען מיט לחיים און מאציל געווען מברכות קדשו און ארויסבאגלייט.

עס האט אויפגעטרעטן הגה''צ אבד''ק שליט"א, וועלכע האט ארומגערעדט בשבח קהלתינו הק' און די געוואלדיגע הצלחה פון קהלתינו הק', און מסיים געווען מיט ווארימע ברכות פאר גיסו מרן רבינו שליט''א און פאר קהלתינו הק'.

רבינו שליט''א האט משמיע געווען לענגערע דברות קודש הדרכה וחיזוק פאר אנ"ש תושבי מאנטרעאל, און נאך די דברי תורה מעורר געווען אויף אסאך ענינים הצרכים חיזוק, און ארומגערעדט בשבח קהלתינו הק' במאנטרעאל א קהלה נאה וחסידה, ובפרט פונעם ביהמ"ד הגדול וואס איז אויסגעשטיגן א צענטער לתורה ולתפילה, און מסיים געווען בברכות לרוב פארן גאנצן ציבור.

נאך די דב''ק האט דער רבי געטרינקן לחיים און אנגעווינטשן פארן גאנצן ציבור, און עקסטער פאר הרבני הנגיד ר' יעקב זוסמאן סופר הי''ו. מען האט געענדיגט ארום 11:40, אויפן וועג ארויס האט זיך רבינו שליט"א באדאנקט פאר הרבני הנגיד הנכבד ר' מיכל ראזענבערג הי"ו דער בעה"ב פונעם עלעגאנטן האטעל וועלכער איז אויך דער בעה"ב פונעם 'קראון' האטעל אין קאנעטיקוט, ווי מערערע חבורות פון חסידישע אידן אין ניו יארק פארן צו פראווען א 'שבת התוועדות', פארן אהער שטעלן א מקוה כשירה אינעם האטעל אין קאנעטיקוט אויף די פערזענדליכע בקשה פון רבינו שליט"א, דער רבי האט אים מאציל געווען ברכות לרוב, און איז אהיימגעפארן לבית האכסניא.

שפעטער איז רבינו שליט"א אריבער אויף א באזוך בבית משפ' הרה"ח ר' שמואל בנימין סופר ז"ל, ס'האט זיך פארמירט א הערליכע שמועס בקורות ימי מאנטרעאל מימי קדם, במנהגי שב"ק פון מרן החת"ס ז"ל און מנהגי רביה"ק זיע"א, דער רבי האט געטרינקן לחיים און מאציל געווען מברכת קדשו פאר אלע בני המשפחה, און ספעציעל פאר'ן נדבן הס"ת הרה"ח ר' יעקב זוסמאן הי"ו און פאר זיין מאמע תחי', און דער רבי איז צוריק געפארן לבית האכסניא.

▫️ סאטמאר'ע נייעס 🌴 ▫️

באריכט ביקור המרומם ומסע הקודש פון כ''ק מרן רבינו הגה''ק שליט''א קיין מאנטרעאל, קאנאדא - חלק ה'

מוצש"ק חיי שרה

נאך הבדלה האט רבינו שליט''א משמיע געווען דברות קודש מלא חיזוק והדרכה דורך א הוק-אפ פאר די הונדערטער אלמנות וועלכע זענען געווען באטייליגט ביים הערליכן שבת עונג הרוחות, ביים מעמד הדלקה באתרא קדישא מירון יצ"ו.

ארום 8:20 איז פארגעקומען בבית האכסניא א מעמד הכרת הטוב דורך חברה הצלה ד'מאנטרעאל לכבודו פון הרבני הנגיד ר' מנחם ליבערמאן הי"ו וועלכע האט מנדב געווען א אמבולאנס פאר חברה הצלה, עס האט אויפגעטרעטן הרה"ח ר' מנחם מאיר פייג הי"ו מראשי העסקנים במאנטרעאל וועלכע האט ארומגערעדט בשבח פון ר' מנחם הי''ו, און די איבריגע עסקני קהלתינו וועלכע שטייען צו הילף מיט אלעס וואס פעלט זיך אויס, דער רבי האט געטרינקן לחיים און ווארעם אנגעוואונטשן פאר אלע וואלונטירן, און איבערגעגעבן א זילבערנע וויין פלאש פאר ר' מנחם הי"ו בשם די חברה הצלה אלץ הכרת הטוב פאר זיינע פילצאליגע פעולות לטובה פאר הצלה בפרט און פאר מאנטרעאל בכלל.

דערנאך איז געווען זמני כניסה בקודש פנימה פאר אנ"ש תושבי קרית טאהש, ביז ארום 9:30.

נאך די זמני כניסה איז רבינו שליט''א אריבער בבית משפחת הרה"ח ר' יעקב יהושע ווערצבערגער ע"ה, וואס די אלמנה תחי' האט מנדב געווען א גרויסע סכום פארן ביהמ"ד אינאיינעם מיט אירע קינדער לע"נ בעלה /אביהם, עס האט זיך פארמירט א שיינע שמועס איבער פארשידענע היסטארישע כתבים וואס ר' יעקב יהושע האט געהאט איז זיין באזיץ, דער רבי האט געטרינקן לחיים און מאציל געווען מברכות קדשו פארן אלמנה און די גאנצע משפחה.

פון דארט איז רבינו שליט''א אריבער בבית מוה"ר אהרן משה שווארץ שליט"א וואס זיינע קינדער האבן מנדב געווען א סכום נכבד פארן ביהמ"ד, עס האט זיך פארמירט א שיינע שמועס איבער די קרובי המשפחה הגה"צ ר' שמעי' שווארץ זצ"ל אב"ד סאטמאר מאנטרעאל רבות בשנים, און הרה"ח ר' אשר שווארץ ז"ל הנקרא ר' אשר גבאי, משב"ק ביי רבותינו הק' לבית סיגוט, דער רבי האט געטרינקן לחיים ומאציל געווען מברכות קדשו.

פון דארט איז רבינו שליט''א אריבער אויף א באזוך ביי הגה"צ ר' וואלף בער לערנער שליט"א דומ"ץ בעלזא מאנטרעאל, ווי עס איט אויך אנוועזענד געווען אלע דייני ומו"צ דק"ק בעלזא, עס האט זיך פארמירט א לענגערע שמועס בכמה מקצועות התורה, און פארשידענע אינטערסאנטע שאלות, תהליכות בקודש און מנהגים ביי הרה"ק מהרי"ד מבעלזא זיע"א, דער דיין שליט"א האט מכבד געווען דעם רבי'ן מיט לחיים און דער רבי האט מאציל געווען מברכות קדשו.

נאכן באזוך ארום 11:00 איז רבינו שליט''א אנגעקומען צום גיגאנטישן שאטער - בנין, צום מעמד סיום כתיבת האותיות פאר'ן ספר תורה וואס איז געשריבן געווארן דורך הרבני הנגיד ר' יעקב זוסמאן סופר הי"ו, ביים אנקומען האט דער רבי געטאנצען אויפן פלאץ פאר עטליכע מינוט, במשך דעם מעמד האט מען געזינגען ניגוני התעורורות און האברך ר' דוד קליין הי"ו האט פארגעזינגען ספעציעלע חרוזים לכבוד המעמד, דערנאך האט דער נדבן הרבני הנגיד ר' יעקב זוסמאן הי"ו אריינגעברענגט די ספר תורה און אראפגעלייגט אויפן רבינ'ס טיש, און מען האט ממשיך געווען מיט ניגוני התעורורות, דער רבי האט זיך געוואשן די הענט און אריינגעשריבן די אותיות.
דערנאך האט דער רבי געטרינקן לחיים און ווארעם אנגעוואונטשן פארן חשובן נדבן און פארן גאנצן ציבור, און משמיע געווען דב"ק במצוות כתיבת ס''ת, ארויסברענגענדיג דאס חשיבות פון א דיבור, א שורה גמרא, דאווענען, וכו' אבער דאס קען נאר זיין אויב מען איז ממעט בהבלי עולם הזה און תאוות הגשמיות, דער רבי האט מסיים געווען בדברי שבח פונעם חשובן נדבן און ארויסברענגענדיג זיינע פילצאליגע פעולות לטובה, און אנגעוואונטשן ברכות לרוב פארן חשובן נדבן און פארן גאנצן ציבור.

נאך די דב''ק איז רבינו שליט''א געגאנגען הגבה, און זיך ארויסגעלאזט אין א פייערליכע טאנץ מיטן אפענעם ספר תורה, מיט גלילה איז מכובד געווארן הרה"ח ר' אליעזר שפיטצער הי"ו און מיט אנטוהן דעם כתונת הרה"ח ר' יעקב לייב סופר הי"ו (וומסב''ג), דערנאך האט דער נדבן איבערגענומען די ס''ת און דער רבי האט מעטר געווען די ס"ת מיט'ן כתר תורה, און דערנאך איבערגענומען די ס''ת און געטאנצן א לענגערע צייט, דערנאך האט דער רבי מכבד געווען דעם נדבן צו טאנצן מיט די ס''ת. מען האט געענדיגט ארום 12:40, דער רבי האט געווינטשן א גוטע וואך פארן גאנצן ציבור און איז ארויסבאגלייט געווארן בשירה וזמרה.
בבית האכסניא איז אריבערגעקומען אויף א ביקור גומלין הגה"צ ר' יוחנן וואזנער שליט"א ראב"ד סקווירא, עס האט זיך פארמירט א שיינער שמועס און דער דיין שליט"א האט געגעבן פארן רבין ספרו שו"ת חיי הלוי חלק י"א, דער רבי האט אים מכבד געווען מיט לחיים און מאציל געווען מברכות קדשו און ארויסבאגלייט ביז צו די גאס.

דערנאך זענען אריין בקודש פנימה די קבוצה מזמרים מאנשי שלומינו וועלכע האבן אנגעפירט די מעמדים במשך די פארלאפענע טעג, דער רבי האט געזאגט דברי ברכה און אלע מזמרים זענען אריבער און דער רבי האט ווארעם אנגעוואונטשן.

▫️ סאטמאר'ע נייעס 🌴 ▫️