סאטמארע נייעס

פרייטאג ערש''ק שלח 'בצל הקודש' פון כ''ק רבינו הגה''ק שליט''א

אינדערפרי איז דער רבי אריבער אין מבצר הכוללים ווי עס איז פארגעקומען די ברית'ן פאר תאומים הנולדים אצל אצל ר' שאול ברי"ש בראך הי"ו ווי דער רבי איז געווען סנדק.

דער רבי האט געדאווענט שחרית בבנין הת"ת בנין מארקאוויטש אינאיינעם מיט ישיבה קטנה סניף דרכי תורה פון מאנסי בהנהלת הר"ר שאול יחזקאל פערלשטיין שליט"א.
ביים אנקומען אין ת"ת האט זיך דער רבי אומגעקוקט אויף די אינגערע כתות וועלכע זענען געווען פארזאמלט אינעם עס-זאל פונעם בנין הת"ת.
פארן דאווענען האט דער רבי געלייגט תפילין פאר די בר מצוה בחורים.
- ב"ר אברהם וואלף מארקאוויטש הי"ו.
- ב"ר ישראל גרינפעלד הי"ו (מאנסי).
- ב"ר אברהם יוסף כיבודי הי"ו.

נאכן דאווענען איז פארגעקומען א מסיבת לחיים בהיכל הביהמ"ד, מען האט געזינגען עטליכע ניגונים, דער רבי האט געטרינקן לחיים און אנגעוואונטשן פאר די בר מצוה בחורים, רמ"י ותלמידי הישיבה, און משמיע געווען דב"ק אויפן פסוק 'והיה באכלכם מלחם הארץ תרימו תרומה לה' און ארויסגעברענגט אז תרומה איז מלשון התרוממות און ארומגערעדט הדרכה זיך צו מרומם זיין בלימוד התורה, מער התמדת התורה, מער יגיעת התורה, לחם הארץ ווייזט אויף גשמיות, אפילו ביי א דבר גשמיות דארף מען זיך פירן תרימו תרומה לה' מיט א דערהויבנקייט ווי עס פאסט פאר א חסידישע בחור, ביים עסן דארף מען עסן מיט א הוט, און בענטשן מיט כוונה וכו', און דער רבי האט מסיים געווען בברכת קדשו מען זאל זיך קענען פירן 'בדרכי תורה' בכל ענינים.

נאך שחרית האט דער רבי מנחם אבל געווען הרה"ח ר' מנחם יודא אונגאר הי"ו היושב ע"פ אביו הרה"ח ר' ארי' אונגאר ע"ה.

▫️ סאטמארע נייעס 🌴 ▫️

דאנערשטאג שלח 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית אין ישיבה גדולה סניף ברך משה. פארן דאווענען האט דער רבי געלייגט תפילין פאר די בר מצוה בחורים.
- ב"ר ישראל ברוין הי"ו.
- ב"ר יואל ב"ר ליפא רובין הי"ו.

ביים ליינען איז דער רבי געגאנגען הגבה. און נאכן דאווענען פארגעלערנט דעם טעגליכן תהילים שיעור אויף קאפיטל ל"א פסוק כ'. דערנאך איז פארגעקומען א לחיים מיט די בר מצוה בחורים בחדרו הפרטי.

אין די נאכמיטאג שעות זענען אריין בקו''פ חברי הנהלת מוסדותינו הק' פון מאנסי און האבן געברענגט ה' קייטלעך לשמירה ולהצלחה וואס עס וועלן פארטיילט ווערן פאר די תלמידות בית רחל וועלכע האבן זיך מקבל געווען קבלת טובות בעניני טעכנעלאגיע, דער רבי האט געבענטשט די קייטלעך און אנגעוואונטשן ברכת קדשו.

ארום 6:15 האט דער רבי געדאווענט מנחה בביתו נאוה קודש אויף צאנז קט.

ארום 7:40 איז דער רבי אריבער אין שטוב פון הרה"ח ר' יצחק פעדער הי"ו לרפו"ש, ווי עס איז פארגעקומען א חתימת שטרות ווי בנו הרבני הנגיד ר' שלמה פעדער הי"ו פון וומסב''ג האט אפגעקויפט די זכות פון די נייע 'תקנות חתונה זאל' וועלכע ווערט געבויעט בבנין הבית רחל החדש 'בנין קליין' אין קר"י, פארן פאנטאסטישן סומע פון פינף מיליאן דאלער, דערביי זענען אנוועזנד געווען חברי הנהלת המוסדות און די חברי וועד החתונה תקנות.
הרה"ח ר' שלמה זלמן ווייס הי"ו אדמיניסטראטער פון מוסדות קרית יואל האט אויפגעטרעטן און פארגעשטעלט די מצב כהיום מיט די פילע תקנות זאלן וואס איז דא אין רק"י פאר חתונות, תנאים'ס, שבת שבע ברכות, און די שטארקע געברויך פאר נאך א חתונה זאל אין ק"י, דערביי האט זיך פארצויגן א שיינער שמועס איבער די פילע פעולות פון די וועד החתונה תקנות בעבר, ועוד ידם הנטויה בעז"ה מיט נאך פלענער אויף לעתיד.
דער רבי האט אינטערגעשריבן די שטרות אינאיינעם מיטן נדבן און די הנהלת המוסדות, געטרינקן לחיים און מאציל געווען מברכת קדשו פאר ר' שלמה הי"ו, פאר אביו הרה"ח ר' יצחק הי"ו לרפו"ש, און פאר די גאנצע משפחה, און דערנאך משמיע געווען דב"ק און ארויסגעברענגט די גרויסע זכי' צו קענען העלפן א בנין פאר די בית רחל פון ווי עס וועלן בעז"ה ארויסקומען ערליכע אידישע מאמעס פון די קומענדיגע דור, און איבער די זכי' צו ארויסהעלפן אידן בעת שמחתם און מסיים געווען מיט ברכות לרוב.
דערנאך האט דער רבי געגעבן א מתנה פאר ר' שלמה הי"ו א זילבערנע צינדער מיט וואס דער רבי האט אנגעצינדן די לעכט איידער תפילת מעריב ליל ל"ג בעומר לכבוד התנא האלקי רבי שמעון בר יוחאי ביים מעמד הדלקה רבתי במקהלות רבוא רבבות ישראל. מען האט געענדיגט ארום 8:10.

זמני כניסה בקו''פ איז געווען פון 8:15 ביז 11:45 אויפדערנאכט בביתו נאוה קודש אויף איהעל קט.

ארום 9:00 איז דער רבי אראפ אין די זאלן בביתו נאוה קודש ווי דער רבי האט געליינט די תנאים פון די מחותנים.
- הרה"ח ר' יו"ט ליפא וויינבערגער הי"ו און הרה"ח ר' אלי' יודא ראטה הי"ו.
- הרה"ח ר' יצחק וויינשטאק הי"ו און הרה"ח ר' יואל בר"ש רובינשטיין הי"ו.

נאך די תנאים'ס איז דער רבי אריין אין די נייע קאך וועלכע איז נארוואס פארענדיגט געווארן בביתו נאוה קודש ווי עס וועלן ווערן געקאכט די סעודות שב"ק פאר די פיר שבת שבע ברכות זאלן בביתו נאוה קודש, און פאר די פילע 'מכובד' זאלן אין פילע לאקאציעס איבער גאנץ קרית יואל פאר ביליגע פרייזן, דער רבי האט זיך אומגעקוקט אויף די קאך איינריכטונגען און דערביי געהערט א באריכט פון די חברי וועד החתונה תקנות און מאציל געווען מברכת קדשו.

דער רבי האט געדאווענט מעריב ארום 10:00 און דערנאך ווייטער ממשיך געווען אויפנעמען דעם ציבור.

▫️ סאטמארע נייעס 🌴 ▫️

מיטוואך שלח 'בצל הקודש' פון כ''ק רבינו הגה''ק שליט''א

אינדערפרי איז פארגעקומען די ברית'ן.
- לבן הנולד אצל ר' ישראל מאיר אקער הי"ו ווי דער רבי איז געווען סנדק ומוהל.
- לבן הנולד אצל ר' יואל נחמי' ראלניצקי הי"ו ווי דער רבי איז געווען סנדק ומוהל.
- לבן הנולד אצל ר' שמעון מערץ הי"ו - מאנטריאל, ווי דער רבי איז געווען סנדק.

דער רבי האט געדאווענט שחרית אין ישיבה גדולה סניף ויואל משה. פארן דאווענען האט דער רבי געלייגט תפילין פאר די בר מצוה בחורים.
- ב"ר שמשון אליעזר מארמארשטיין הי"ו.
- ב"ר אליעזר זוסיא פליישמאן הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל ל"א פסוק כ'. דערנאך איז פארגעקומען א לחיים מיט די בר מצוה בחורים בחדרו הפרטי.

ארום 6:45 האט דער רבי געדאווענט מנחה בביתו נאוה קודש אויף צאנז קט.

ארום 8:20 איז דער רבי אריבער אין די זאלן פון שאפינג סענטער צו די שמחת השבע ברכות צוגעשטעלט דורך הגאון הגדול הדומ"ץ שליט"א לרגל נשואי נכדתו למז"ט הכלה בת לבנו הר"ר משה הערש בערקאוויטש שליט"א.
עס האט זיך פארצויגן א שיינע שמועס בדברי הלכה בעניני נישואין, דער רבי האט געטרינקן לחיים און אנגעוואונטשן פארן חתן, מחותנים, זיידעס, ובמיוחד פאר ידידו הגאון הגדול הדומ"ץ שליט"א, דערנאך האט זיך דער רבי אויפגעשטעלט טאנצן אינאיינעם מיט די גאנצע אויבנאן און דערנאך עקסטער מיטן חתן און מיט הגאון הגדול הדומ"ץ שליט"א. דער רבי האט פארלאזט די זאל ארום 8:35.

זמני כניסה בקו''פ איז געווען פון 8:40 ביז 12:40 אויפדערנאכט בביתו נאוה קודש אויף איהעל קט.

ארום 9:10 איז דער רבי אראפ צו די זאלן בביתו נאוה קודש ווי דער רבי האט געליינט די תנאים פון די מחותנים הרה"ח ר' משה אלי' פריעד הי"ו און הרה"ח ר' יעקב זאב כ"ץ הי"ו.

דער רבי האט געדאווענט מעריב ארום 12:40.

▫️ סאטמארע נייעס 🌴 ▫️

דינסטאג שלח 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית אין ישיבה גדולה סניף עצי חיים - שיעור ג'. נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל ל"א פסוק ו'.

נאך שחרית איז דער רבי אריבער אין שטוב פון נכדו הר"ר ליפא רובין שליט"א בן האדמו"ר מ'ראפשיץ שליט"א וחתן חדב"ן הגה"צ רב דביהמ"ד ברך משה שליט"א, צו די חאלאקע פון בנו הילד שמואל שמעלקא ני"ו, דער רבי האט אפגעשניטן עטליכע האר, אנגעטוהן דאס קאפל און ציצית, און אנגעוואונטשן ברכת קדשו.
דערנאך האט זיך דער רבי געוואשן צו פת שחרית, עס האט זיך פארצויגן שיינע שמועסן בסיפורי צדיקים און מען האט געזינגען ניגוני שמחה, מיטן בענטשן האט דער רבי מכבד געווען האדמו"ר מראפשיץ שליט"א.

ארום 4:45 איז דער רבי אנגעקומען אין מאנסי צום מעמד חנוכת הבית פארן נייעם בנין פון די 'גאלדן טעיסט' פירמע אינטער די אייגנטומערשאפט פון הרבני הנגיד ר' רפאל פערלמוטער הי"ו, דער רבי האט זיך אומגעקוקט אויף די מאסיווע פראדוקציע פון די ברייט באקאנטע פירמע, און זיך באגריסט מיט אחיו הגה"צ רב דקהלתינו ב''פ 15 שליט"א וועלכע איז געקומען צום מעמד לכבודו פון הרה"ח ר' רפאל הי"ו אלץ הכרת הטוב פאר זיינע פילע פעולות און נדבות לטובת כולל עצי חיים אין בני ברק, און דער רבי האט קובע געווען א מזוזה אויפן הויפט אריינגאנג.
דערנאך איז דער רבי אריין אינעם קאנפערענץ צימער ווי עס איז פארגעקומען א מסיבת לחיים לרגל די חנוכת הבית פונעם בנין, אינאיינעם מיט א מסיבת לחיים לרגל שמחת נשואי בנו למז"ט, דערביי איז פארגעקומען א חתימת שטרות ווי הרה"ח ר' רפאל הי"ו האט אפגעקויפט דעם זכות פונעם אוצר הספרים אינעם בנין החדש פון ישיבה קטנה סניף קנין תורה אין מאנסי, עס האט זיך פארצויגן א שיינע שמועס איבער די הרחבת גבולי הקדושה פון קהלתינו הק' ווי מען מאכט שוין א הנחת אבן הפינה פאר די זיבעטע ביהמ"ד פון קהלתינו הק'.
דער רבי האט געטרינקן לחיים און אנגעוואונטשן ברכות קדשו, דערנאך האט דער רבי אינטערגעשריבן די שטרות אינאיינעם מיטן נדבן און די הנהלת הישיבה און ווארעם אנגעוואונטשן פאר ר' רפאל הי"ו ובני משפחתו.

דערנאך איז דער רבי ארויף אינעם נייעם זאל אויפן צווייטן שטאק ווי עס איז פארגעקומען דער מעמד הנחת אבן הפינה פאר בית מדרשינו החדש בשכונת רידזש אין מאנסי נדבת הרבני הנגיד ר' רפאל הי"ו, עס האט אויפגעטרעטן הרה"ג ר' יעקב ווייס שליט"א מרבני קהלתינו מאנסי, דערנאך איז פארגעקומען א התחלת כתיבת ספר תורה נדבת ר' רפאל הי"ו לטובת הביהמ"ד החדש, דער רבי האט אריינגעשריבן די ערשטע אותיות און מכבד געווען אחיו הגה"צ רב דקהלתינו ב''פ 15 שליט"א און הגה"צ אבד''ק מאנסי שליט"א צו שרייבן א אות אין די ספר תורה.
דער רבי האט געטרינקן לחיים און אנגעוואונטשן פארן גאנצן ציבור, מען האט ממשיך געווען מיט ניגוני התעוררות און דער רבי האט דערביי געגאסן דעם אבן הפינה פארן ביהמ"ד, און מכבד געווען אחיו הגה"צ שליט"א און הגה"צ אבד''ק מאנסי שליט"א און דעם נדבן ובני משפחתו צו גיסן דעם אבן הפינה.
דער רבי האט משמיע געווען דב"ק אויפן פסוק 'והיה באכלכם מלחם הארץ תרימו תרומה לה' און נאכגעזאגט פונעם אמרי נועם אז תרומה איז בגי' קול תפילה, אזוי אויך זאגט דער בעל הטורים אז תרומה איז די אותיות תורה מ', און פשוט פשט מיינט תרומה צדקה, און ארויסגעברענגט די שמחה פון א הנחת אבן הפינה ווי מען גייט בויען א ביהמ"ד ווי מען וועט מקיים זיין תרומה לה' מיט אלע פשטים, תורה עבודה וגמילות חסדים, דער רבי האט ממשיך געווען בשבח פון קהלתינו הק' און הגה"צ אבד''ק מאנסי שליט"א וועלכע שטייט אין שפיץ פון די קהילה וואס שטייגט און בליעט בליע"ה, און דערביי קורא שם געווען פארן נייעם ביהמ"ד אלץ 'ביהמ"ד דברי יואל' לשמו ולזכרו פון רביה"ק זיע''א מייסד הקהילה, און אנגעוואונטשן מען זאל קענען בקרוב אויפבויען און מחנך זיין דאס ביהמ"ד און זיך פירן ע"ד המסורה לנו און מסיים געווען בברכת קדשו.
מען האט ממשיך געווען מיט ניגוני שמחה און דער רבי האט זיך אויפגעשטעלט טאנצן אינאיינעם מיטן גאנצן אויבנאן און נאכדעם עקסטער מיטן חתן און דערנאך אין א רינג מיט די גאנצע משפחה.

מען האט געענדיגט ארום 6:00 און דער רבי האט פארלאזט די מעמד אויפן וועג אריין קיין וומסב''ג צו די וועכענטליכע זמני כניסה.

ארום 7:45 האט דער רבי געדאווענט מנחה בביתו נאוה קודש אויף היוז סט.
דערנאך איז געווען זמני כניסה ביז 10:40 אויפדערנאכט בביתו נאוה קודש.

בעת די זמני כניסה איז אריין בקו''פ הר"ר חיים מאיר האגער שליט"א בן כ"ק אדמו"ר מוויזניץ מאנסי שליט"א מקבל זיין ברכת הקודש לרגל שמחת נשואי בתו למז"ט, עס האט זיך פארמירט א שיינע שמועס און דער רבי האט אים מאציל געווען מברכת קדשו.

אזוי אויך איז אריין הגה"צ ר' משולם פייש גינזבערג שליט"א האדמו"ר מחוסט ב"פ אינאיינעם מיט בנו הרה"ג ר' אלעזר יונה שליט"א רב דביהמ"ד סוואליעווע, לרגל נישואי בנו/נכדו הי"ו, ס'האט זיך פארצויגן א לענגערע ידידות'דיגע שמועס בזכרונות מימי קדם, און רבינו שליט"א האט מאציל געווען מברכת קדשו לרגל השמחה.

נאך די זמני כניסה ארום 10:45 איז דער רבי אהנגעקומען אין די זאלן פון עידן פעלעס צום מעמד אדיר 'שמירה לדורות' בהשתפות אלפי אנ''שי אין וומסב''ג.
הגה"צ אבד''ק וומסב''ג שליט"א האט ממשיך געווען מיט זיין פייערדיגע דרשה בעניני צניעות, ובפרט איבער די הארבקייט פון שערות אשה און די פראבלעמען פון די היינטיגע שייטלעך און איבער חינוך הבנים ביי די תלמידי הישיבות און נאך עטליכע ענינים הצריכים תיקון.

ארום 11:10 האט דער רבי אנגעהויבן די דב"ק אויפן פסוק 'והיה באכלכם מלחם הארץ תרימו תרומה לה' לחם מיינט מען א פרוי, תרומה זאגט רש"י לשון הפרשה, דאס קומט זאגן אז ווען מען האט חתונה דארף מען מאכן א הפרשה מען דארף זיך אפשיידן פון פארשידענע זאכן, דער רבי האט ארויסגעברענגט ווי רבותיה"ק זיע''א האבן שטארק מקפיד געווען אויף צניעות און קדושה, און איז געווען פון די הארבסטע זאכן און מעורר געווען אויף דעם אין די הייליגסטע צייטן, דער רבי האט דערציילט וואס איז פארגעקומען ביים הייליגן צאנזער רב זיע''א וועלכע האט געענטפערט פאר א גדול בישראל וועלכע האט געפרעגט אויף א ענין ווי עס שטייט, אז עס שטייט אין מיר און איך בין די תורה!
'די ענינים שטייען אינעם פעטער ז"ל און ער איז די תורה!' און ח"ו צו מקיל זיין מיט אזא שאלה פון ווי ס'שטייט, דער רבי האט ארויסגעברענגט מיט ווייטאג די מצב ווי מען זעט די חילוק וויאזוי די באבע מיט די קינדער און די אייניקלעך גייען אנגעטוהן, עס איז שרעקליך! א שטארקע ירידת הדורות, מען דארף זען זיך פירן תרימו תרומה לה' תרומה מלשון התרוממות, מען דארף זיך פירן דערהויבן און זיך נישט לאזן ווערן נאכגעשלעפט פון די שכנים און חברים נאר זיך האלטן שטאלץ מיט אונזער מסורה, א חלק פון די פראבלעם קומט אז מען שיקט אוועק די בחורים לערנען אין פרעמדע ישיבות און זיי באקענען זיך מיט פרעמדע השקפות און ווערן קאלט צו די ענינים און שפעטער האבן זיי נישט קיין פראבלעם אז זייערע פרויען זענען זיך מקיל ביי די ענינים, דער רבי האט ממשיך געווען זאגענדיג אז בנו הגה"צ דער רב שליט"א האט משמיע געווען א פייערדיגע דרשה דברים היוצאים מן הלב און וועט בעז"ה זיין נכנסים אל הלב און אינעם מח, און שטארק מחזק געווען זיינע ווערטער און געזאגט פאר יעדע יחיד אז דיר מיינט מען, און יעדער בפרטיות דארף זיכער מאכן אז ביי זיין שטוב און ביי זיינע קינדער און אייניקלעך זאל מען זיך פירן ווי עס פאסט און גודר גדר זיין ווי מען קען, דער רבי האט שטארק משבח זיין די פעולות ווי פילע תלמידות בית רחל האבן זיך געלאזט אפשערן די לאנגע האר אין די לעצטערע וואכן און עס שטארק מחזק געווען, און מסיים געווען און אנגעוואונטשן מען זאל קענען מצליח זיין צו מקיים זיין אלע תקנות, ובזכות נשים צדקניות נגאלו בב"א.

דערנאך האט דער רבי געדאווענט מעריב אינעם זאל, בעל תפילה: הר"ר ישעי' יצחק רובין שליט"א.
ארום 11:50 איז דער רבי אהיימגעפארן קיין קר''י.

▫️ סאטמארע נייעס 🌴 ▫️

מאנטאג שלח 'בצל הקודש' פון כ''ק רבינו הגה''ק שליט''א

דער רבי האט געדאווענט שחרית אין ישיבה גדולה סניף דברי יואל. ביים ליינען האט דער רבי עולה געווען שלישי. און נאכן דאווענען פארגעלערנט דעם טעגליכן תהילים שיעור אויף קאפיטל ל"א פסוק ב'.

בחדרו הפרטי האט רבינו שליט"א צום ערשטן מאל אנגעטוהן די הייליגע תפילין דרבינו תם וועלכע האט נאך באלאנגט פאר זקינו מרן הגה"ק בעל קדושת יו"ט זיע''א ולאחריו רביה"ק בעל דברי יואל זיע''א ולאחריו אביו הגדול רביה"ק בעל ברך משה זיע''א און איז אויסגעפאלן בגורלו של רבינו שליט"א בעת די חלוקת הירושה.

אין די נאכמיטאג שעות האבן זיך טעלעפאניש פארבינדן מיט'ן רבי'ן די רבנים המכשירים הרה"ג ר' הערש לייב בערנשטיין שליט"א יו"ר וועד הכשרות קר"י ודומ"ץ ביהמ"ד בית מנחם צבי דקהלתינו וומסב''ג און הרה"ג ר' יואל יצחק שטערן שליט"א דומ"ץ ביהמ"ד דינוב קר''י, וועלכע זענען ספעציעל אראפגעפארן בשליחת הקודש קיין יומא אריזאנע אינאיינעם מיטן מומחה בעניני חיטים הרה"ג ר' יצחק יעקב כייעם שליט"א וועלכער איז ממונה על משמרת החיטים מטעם קהלתינו הק'. און די מנהלי בית האופה פון קרית יואל און וומסב"ג. לרגל דעם ערשטן "ווייץ שניט" פאר די מצות פראדוקציע שע''י קהלתינו הק' לקראת חג הפסח שנת תשפ''ז הבעל''ט, די דיינים און מנהלים האבן איבערגעגעבן א באריכט פונעם פעלד זיך גרייטענדיג אנצוהייבן צו שניידן די ווייץ אין די קומענדיגע מינוטן, און דער רבי האט איבערגעגעבן עטליכע הוראות והדרכות און מאציל געווען מברכת קדשו.

נאכמיטאג איז דער רבי ארויף אין ישיבה סניף דברי יואל ווי דער רבי האט געלערנט מיט א חברותא מתלמידי הישיבה בחדרו הפרטי.

אין ישיבה זענען אריין בקו''פ א קבוצה לומדי מבצר הכוללים וועלכע זענען יעצט עוסק בהלכות טריפות און האבן אריבערגעברענגט א עוף וועלכע איז היינט געשחט'ן געווארן אינעם בית השחיטה המהודרת און האט פארמאגט דריי פיס, עס האט זיך פארמירט א שיינע שמועס בהלכות טריפות און דער רבי האט אויסגעשמועסט עטליכע שאלות וועלכע מאכן זיך פון צייט צו צייט, און אנגעוואונטשן ברכת קדשו פאר די לומדי הכולל.
ארום 6:00 האט דער רבי געדאווענט מנחה אין ישיבה.

זמני כניסה בקו''פ איז געווען פון 8:30 ביז 11:30 אויפדערנאכט בביתו נאוה קודש אויף איהעל קט.

בעת די זמני כניסה איז געקומען אויף א באזוך בקו''פ הגאון רבי משה בראנדסדארפער שליט"א גאב"ד היכל הוראה בירושלים עיה"ק, עס האט זיך פארצויגן א שיינע שמועס בהלכה און איבער דעם מצב פון די גזירת הגיוס בארה"ק, און דער רבי האט אים מאציל געווען מברכת קדשו.

ארום 9:10 איז דער רבי אראפ צו די זאלן בביתו נאוה קודש ווי דער רבי האט געליינט די תנאים פון די מחותנים הרה"ח ר' גדלי' בר"ב אפפעל הי"ו און הרה"ח ר' יודא לייב בר"א ווייס הי"ו.

אויך איז פארגעקומען א כתיבת האותיות פאר די ספר תורה וואס ווערט געשריבן דורך הרה"ח ר' אייזיק ליפא בר"ש ווידער הי"ו און ווערט אריינגעגעבן קומענדיגן זונטאג קרח אין ביהמ"ד אור לשמים, דער רבי האט אריינגעשריבן עטליכע אותיות געטרינקן לחיים און מאציל געווען מברכת קדשו.

דער רבי האט געדאווענט מעריב ארום 11:30.

▫️ סאטמארע נייעס 🌴 ▫️

זונטאג שלח 'בצל הקודש' פון כ''ק רבינו הגה''ק שליט''א

מוצש''ק האט דער רבי טעלעפאניש מנחם אבל געווען האחים האדמורי"ם מראחמיסטריווקא שליט"א היושבים ע"פ אמם הרבנית מראחמיסטריווקא עה.

דער רבי האט געדאווענט שחרית אין ישיבה גדולה סניף קדושת יואל. פארן דאווענען האט דער רבי געלייגט תפילין פארן בר מצוה בחור ב"ר נפתלי שטערן הי"ו.

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל ל"א פסוק ב'. דערנאך איז פארגעקומען א לחיים מיטן בר מצוה בחור בחדרו הפרטי.

ארום 1:00 איז דער רבי אריינגעפארן קיין ב''פ צו די חומש סעודה פון תלמידי מוסדותינו הק' פון ב"פ.
ארום 2:45 איז דער רבי אנגעקומען אין ביהמ"ד הגדול, דער רבי איז אריין אין היכל הביהמ"ד ווי עס זענען אנוועזנד געווען די הונדערטער עלטערן און זיידעס פון די קינדער צווישן זיי פילע אדמורי"ם ורבנים, דער רבי איז ענטפאנגען געווארן דורך די ילדי התשב"ר מיט שיינע חרוזים לכבוד המאורע. עס האט אויפגעטרעטן הר"ר יוסף בנימין שטערן שליט"א מנה"ר, דערנאך האט אויפגעטרעטן דער מנהל המוסדות הרה"ח ר' אהרן וועלץ הי"ו, אויך האט אויפגעטרעטן חדב"ן הגה"צ רב דביהמ"ד ישמח משה שליט"א זיידע פון א חתן המקרא.

די קינדער האבן פארגעזאגט די פסוקי חומש פון פרשת ויקרא, אנגעפירט דורכן מלמד מומחה הר"ר יודל ווערצבערגער שליט"א, דערנאך זענען אלע קינדער אריבער און דער רבי האט פארטיילט א סידור פאר אלע קינדער.

דער רבי האט געטרינקן לחיים, און אנגעוואונטשן פארן גאנצן ציבור, און משמיע געווען דב"ק לכבוד די חתני החומש נאכזאגענדיג פונעם חתם סופר אז התחלה איז חצי הכול, און דאס איז די גרויסע שמחה ביים אנהייבן לערנען חומש, דאס איז א יו"ט סיי פאר די קינדער און סיי פאר זייערע עלטערן, און אנגעוואונטשן ברכת קדשו.
מען האט געענדיגט ארום 3:45.

דערנאך איז דער רבי צוגעפארן צום שטח פון בית מדרשינו החדש לב אהרן וועלכע הייבט אין די יעצטיגע טעג אן מיט די פאקטישע בוי ארבעט, דער רבי איז צוגעפארן מיט די קאר און זיך אומגעקוקט אויף די בוי ארבעט און מאציל געווען מברכת קדשו פאר די חברי וועד קרן הבנין.

פון דארט איז דער רבי צוגעפארן צו די שטאטישע מקוה טהרה וועלכע איז נארוואס פראכטפול איבערגעבויעט געווארן דורך האחים החשובים ר' מענדל און ר' יחזקאל שרגא גאלדבערגער הי"ו בני הרה"ח ר' יעקב משה גאלדבערגער הי"ו, דער רבי איז ארום אינעם גאנצן מקוה אין באגלייטונג פון הגה"צ דומ"ץ דקהלתינו ב"פ שליט"א, און נאך דייני קהלתינו, צווישן אנדערע הרה"ג ר' אלעזר ניסן שטראהלי שליט''א דומ"ץ ביהמ''ד 36 סט. וועלכע איז געשטאנען בראש פון די פראיעקט איבערצובויען די מקוה, און הרה"ג ר' יצחק טריגער שליט"א - מגדולי המומחים בעניני מקוואות, און זיך אומגעקוקט אויף די גאנצע מקוה און אויסגעשמועסט פארשידענע הידורים און חומרות בעניני מקוואות, און צום סוף האט דער רבי קובע געווען א מזוזה אויפן הויפט אריינגאנג.

דערנאך איז דער רבי ארויף אויף א מסיבת לחיים אין שטוב פונעם נדבן הרה"ח ר' יחזקאל שרגא הי"ו, עס האט זיך פארצויגן א שיינע שמועס איבער די היסטאריע פון די מקוה טהרה אין ב"פ וואס רביה"ק בעל דברי יואל זיע''א האט געבויעט, און איבער נאך פארשידענע מקוואות טהרות איבער דער גארער וועלט, דער רבי האט געטרינקן לחיים און אנגעוואונטשן פאר די נדבנים ובני משפחתם, פאר די אנוועזנדע דיינים שליט"א און פארן גאנצן ציבור.

פון דארט איז דער רבי אריבער אויף ניחום אבלים ביי משפחת הרה"ח ר' שלמה יחיאל פעלבערבוים ע"ה.
ארום 4:50 האט זיך דער רבי ארויסגעלאזט אויפן וועג אהיים קיין קר"י.

פארנאכטס האט דער רבי מסדר קידושין געווען ביי די חופה פון די מחותנים.
- הרה"ח ר' יואל ברז"ל אינדיג הי"ו און הרה"ח ר' יוסף חיים פאלאטשעק הי"ו אין די זאלן פון בית רחל פאראדייס.
- הר"ר יודא שטאלצבערג שליט"א און הר"ר משה אהרן טייטלבוים שליט"א - אב"ד לאפיש, אין די זאלן פון גינת קליין.

זמני כניסה בקו''פ איז געווען פון 8:20 ביז 11:15 אויפדערנאכט בביתו נאוה קודש אויף איהעל קט.

דער רבי האט געדאווענט מנחה ארום 8:50 און מעריב ארום 9:50.
נאך מנחה איז דער רבי אראפ צו די זאלן בביתו נאוה קודש ווי דער רבי האט געליינט די תנאים פון די מחותנים.
- הרה"ח ר' חיים אברהם ווייס הי"ו און הרה"ג ר' וואלף אהרן טעללער שליט"א.
- הרה"ח ר' יואל וואלף שעהר הי"ו און הרה"ח ר' אלחנן טויב הי"ו.
- הרה"ח ר' חיים מאיר עהרנטאל הי"ו און הרה"ח ר' יואל בר"ה סאנדעל הי"ו.

▫️ סאטמארע נייעס 🌴 ▫️