סאטמארע נייעס

מאנטאג פרשת וירא 'בצל הקודש' פון כ''ק מרן רבינו הגה''ק שליט''א

אינדערפרי איידער תפילת שחרית איז פארגעקומען די ברית לבן הנולד אצל ר' שלמה בר"מ הירש הי"ו, ווי דער רבי איז געווען סנדק.

רבינו שליט''א האט געדאווענט שחרית בהיכל המתיבתא סניף ברך משה. פארן דאווענען האט דער רבי תפילין געלייגט פאר'ן בר מצוה בחור ב"ר יואל פריינד הי"ו.
ביים ליינען איז דער רבי געגאנגען הגבה. און נאכן דאווענען פארגעלערנט דעם טעגליכן תהילים שיעור אויף קאפיטל י"ד פסוק ב', דערנאך איז פארגעקומען א לחיים מיט'ן בר מצוה בחור בחדרו הפרטי.

נאכמיטאג איז דער רבי ארויף בהיכל הישיבה סניף ברך משה ווי דער רבי האט געלערנט מיט א חברותא מתלמידי הישיבה בחדרו הפרטי, און ארום 5:10 האט דער רבי געדאווענט מנחה אין די ישיבה.

דער רבי האט געדאווענט מעריב ארום 8:15 בביתו נאוה קודש און דערנאך אריבער שפאצירט צו די זאלן פון קרן ויואל משה ווי עס איז פארגעקומען די שבע ברכות דורכ'ן רבין שליט"א פאר די בני המשפחה, ווי עס זענען געלאדענט געווארן עסקני קהלתינו הק' וואס געבן זיך אוועק למען כבוד קהלתינו הק' מיטן צושטעלן די מעמדים און שמחות בחצרות קדשינו ובפרט דעם פארלאפענעם חודש תשרי העעל"ט, ביים אנקומען איז דער רבי ארויס אין א ריקוד אויפן פלאץ פאר עטליכע מינוט, און דערנאך זיך געוואשן צו די סעודה.

עס האט אויפגעטרעטן הרה"ח ר' יחזקאל פרענקל הי"ו מיט דברי הערכה לכבוד שמחת בית רבינו משולב מיט הכרת הטוב פאר די עסקנים, און דערנאך האט ער אויך אנגעפרעגט פון רבי'ן פארשידענע הדרכות און הוראות וואס איז נוגע פאר עסקנים, אויף וואס רבינו שליט"א האט געענטפערט און אויסגעשמועסט בטוב טעם ודעת.

דערנאך איז פארגעקומען א פאנעל בדברי בדחנות דורך הרה"ח ר' הערשל פריעדמאן הי"ו, אינאיינעם מיט הרה"ח ר' יצחק גרינפעלד הי"ו, און ר' חיים הערש גלאנצער הי"ו.
מטעם הקהלה האט נאכדעם אויפגעטרעטן הרה"ח ר' דוד עקשטיין הי"ו, מראה"ק.

רבינו שליט''א האט משמיע געווען דברות קודש און ארומגערעדט איבער די חשיבות פון עסקנות למען הכלל און אנגעוואונטשן פאר די עסקנים ברכות לרוב.

נאך די דב''ק האט מען זיך אויפגעשטעלט טאנצן א לענגערע צייט, מיט ברכהמ''ז האט דער רבי מכבד געווען דעם חתן הרב יחזקאל שרגא מייזליש שליט"א. ברכות ראשונות: הרה"ח ר' דוד עקשטיין הי"ו. ברכה אחריתא: הרה"ח ר' אברהם ווידער הי"ו, ראה"ק.
נאכן בענטשן זענען די עסקנים אריבער געבן מזל טוב און אפנעמען ברכת קדשו פון רבינו שליט"א, מען האט געענדיגט ארום 11:15.

▫️ סאטמאר'ע נייעס 🌴 ▫️

זונטאג פרשת וירא 'בצל הקודש' פון כ''ק מרן רבינו הגה''ק שליט''א

רבינו שליט''א האט געדאווענט שחרית בהיכל המתיבתא סניף קדושת יואל. פארן דאווענען האט דער רבי תפילין געלייגט פאר די בר מצוה בחורים.
ב"ר יוסף לייב ברוין הי"ו.
ב"ר נחמי' ניימאן הי"ו.
ב"ר שלמה יעקב לעפפלער הי"ו (ב''פ).

נאכן דאווענען האט דער רבי פארגעלערנט דעם טעגליכן תהילים שיעור אויף קאפיטל י"ד פסוק ב'. דערנאך איז פארגעקומען א לחיים מיט די בר מצוה בחורים בחדרו הפרטי.

אין די פארמיטאג שעה'ן איז דער רבי געווען אויף די וועכענטליכע באזוך אינעם בית השחיטה המהודרת.

נאכמיטאג איז דער רבי ארויף בהיכל הישיבה סניף ברך משה ווי דער רבי האט געלערנט מיט א חברותא מתלמידי הישיבה בחדרו הפרטי, און ארום 5:00 האט דער רבי געדאווענט מנחה אין די ישיבה.

זמני כניסה בקודש פנימה איז געווען פון ארום 8:00 ביז 9:40 אויפדערנאכט, בביתו נאוה קודש אויף איהעל קט. דערנאך האט דער רבי געדאווענט מעריב.

אויפדערנאכט ארום 10:00 איז רבינו שליט''א אנגעקומען אין ביהמ"ד ישמח משה צו די צענטראלע שמחת השבע ברכות בחצרות קדשינו צוגעשטעלט דורך די מתפללי הביהמ"ד לכבוד רבינו שליט"א ולכבוד חדב"ן הגה"צ רב הביהמ"ד שליט"א.
דער רבי האט געטרינקן לחיים און אנגעווינטשן פארן חתן מחותנים און פארן גאנצן ציבור, עס האט אויפגעטרעטן הרה"ח ר' אהרן יוסף לאנדא הי"ו מתושבי השכונה, מיט פרקי חזנות האט מהנה געווען הרה"ח ר' משה לוי ברוין הי"ו מחשובי בית המדרש.
ביי די שבע ברכות האט זיך אויך משתתף געווען כ"ק אדמו"ר מזוועהיל שליט"א.

דערנאך האט הגה''צ רבי מאיר צוויבל שליט"א אויפגעטרעטן בפקודת כ"ק רבינו שליט"א און אויפגעפאדערט דער גאנצער ציבור זיך צו באטייליגן דעם דינסטאג אין די גאר קריטישע וואלן און שטימען פאר די קאנדידאטן אינדארסירט דורך קהלתינו ומוסדותינו הק' עפ"י הוראת רבינו שליט"א.

עס אויפגעטרעטן מיט דברי בדחנות הרה"ח ר' נחמן ליווי הי"ו.

רבינו שליט''א האט משמיע געווען דברות קודש, און נאך די דברי תורה בעניני נישואין אויך ארומגערעדט מיט ווייטאג איבער די פאלשע און פסול'ע מזוזות וועלכע זענען געכאפט געווארן זיך דרייען אינעם היימישן מארק, און דערביי געצייגט פארן ציבור עטליכע פון די געדרוקטע מזוזות, און מזוזות געמאכט מיט א סטענסיל, וועלכע זענען כמעט אוממעגליך צו דערקענען אפילו פאר א סופר מומחה, און בלויז מיט סייעתא דשמיא איז עס געכאפט געווארן, רבינו שליט"א האט אויפגעפאדערט יעדן איינעם וואס וויל האבן כשר'ע מזוזות זאל עס לאזן שרייבן ביי א סופר, און נישט זוכן מציאות ביי סוחרים אין די גאס

ברכהמ''ז האט דער רבי מכבד געווען חדב"ן הגה"צ רב דביהמ"ד שליט"א, ברכות ראשונות: דער מחותן הרה''ג ר' יושע רובין שליט"א אב"ד ראדאוויץ, ברכה אחריתא: הרה''ג ר' יואל גוטמאן שליט"א מו''ץ בקהלתינו. מען האט געענדיגט ארום 11:45.

▫️ סאטמאר'ע נייעס 🌴 ▫️

שב"ק פרשת לך 'בצל הקודש' פון כ"ק מרן רבינו הגה"ק שליט"א.

ערש''ק נאכמיטאג האט רבינו שליט''א אנגעטוהן דעם שטריימל פאר החתן הלל ב''ר עמרם טירנויער הי''ו.

פרייטאג צונאכטס ארום 6:25 איז רבינו שליט''א אריינגעקומען אין ביהמ"ד מעוטף בטליתו און צוגעגאנגען צו מנחה.

נאך מנחה האט דער משמש הרה''ח ר' יואל קויפמאן הי''ו אויסגערופן בפקודת הקודש די וויכטיגע אויפפאדערונג פון הנהלת הקהילה והמוסדות אז יעדער זאל גיין צו די וואלן איש וביתו און שטימען פאר די אינדארסירטע קאנדידאטן.

קבלת שבת: הרה"ח ר' דוד עקשטיין הי''ו, מראה''ק.

מען האט געענדיגט דאווענען ארום 8:00, עס איז פארגעקומען אן אפיעל פאר כולל תפארת בחורים וומסב''ג. דער עולם איז אריבער געגאנגען גוט שבת זאגן, און רבינו שליט''א איז אריין לחדרו הפרטי.

א קורצע צייט נאכן דאווענען איז רבינו שליט''א אריינגעקומען צום שלחה"ט בהיכל השלחנות אינאיינעם מיט די הונדערטער תלמידי המתיבתא, און אנגעהויבן כדרכו בקודש 'שלום עליכם' ברגש ובנעימה.

אשת חיל: נכד רבינו הב' מאיר אליעזר בן הגה''צ רב דביהמ''ד ברך משה שליט''א, הגבהת הכוס לקידוש: מוה"ר אנשיל אילאוויטש הי''ו (בני ברק).

מיט די זמירות האט רבינו שליט''א מכבד געווען. כל מקדש: הרה''ג ר' מוחם יודא גאטליעב שליט''א אב''ד ניאמץ וומסב''ג, מנוחה ושמחה: הרה"ג ר' שלמה בנעט שליט''א מראשי כוללינו בירושלים.

רבינו שליט''א האט געזאגט תורה אויפן פסוק 'ואעשך לגוי גדול' און געטייטשט בדרך דרוש אין די סוגיא פון אין שליח לדבר עבירה.

קה אכסוף: הרה''ח ר' אנשיל אילאוויטש הי''ו, ברכהמ"ז: נכד רבינו בעל שמחה הרב ברוך רוקח שליט''א חתן הגה''צ רב דביהמ''ד אהל פיגא שליט''א.

עובדות וסיפורים די וואך האט רבינו שליט''א דערציילט פון הרה''ק ר' משה'לע משינאווא זיע"א, וואס די יארצייט געפאלט זונטאג י''ב חשון. קה רבון עלם: הרה"ג ר' משה שמואל ראטענבערג שליט''א (וומסב''ג).

די פרישע חתנים זענען אדורך נעמען פירות. דערנאך איז פארגעקומען די שמחת השלום זכר ביי נכד רבינו הרב ברוך רוקח שליט''א, מען האט אריינגעברענגט בונדלעך און ביר, דער רבי האט טוען געווען און פארטיילט שיריים און געוואונטשן פארן בעל שמחה און פאר חדב''ן הגה''צ רב דביהמ''ד אהל פיגא שליט''א, און מען האט געזינגען לכבוד די שמחה.
אויך איז פארגעקומען א שלום זכר ביי הרב מאיר אלכסנדר קליינמאן הי''ו.

אז ביום השביעי: הרה''ח ר' בצלאל טויסיג הי''ו (ירושלים). מען האט געענדיגט ארום 11:40.

וביום השבת קודש

שב"ק צופרי איז רבינו שליט''א אריינגעקומען 9:40. פסוקי דזמרה: הרה''ח ר' מענדל עקשטיין הי''ו, צו שחרית איז רבינו שליט''א צוגעגאנגען.

הוצאה והכנסה: הרה''ג ר' בעריש טירנויער שליט"א רב דביהמ"ד תורת משה וומסב''ג, פסוקי שמע ישראל: הרה"ג ר' דוד הירש שליט"א מו"ץ בקהלתינו וומסב''ג.

עליות. כהן: החתן ב"ר יואל צבי פילאפף הי"ו, לוי: ר' חיים פריעדמאן הי''ו - רבינו שליט"א האט געמאכט דעם מי שברך וקריאת השם לרגל הולדת בתו למז"ט, שלישי: החתן ב"ר עמרם טירנויער הי"ו - באווארפען. רביעי: החתן ב"ר יואל בערקאוויטש - באווארפען. חמישי: הרה"ח ר' דוד עקשטיין הי"ו. שישי: רבינו שליט''א.

נאכן עולה זיין האט רבינו שליט''א געמאכט דעם מי שברך וקריאת השם לרגל הולדת הבת ביי די פאלגענדע בעלי שמחה:
הרה''ג ר' יואל בר"מ סימאן שליט''א.
ר' יצחק ישעי' כ"ץ הי"ו.
ר' יוסף זונדל וויינבערגער הי"ו.
ר' חיים יואל דים הי"ו.
ר' יעקב יואל אינדיג הי"ו.

שביעי: הרה"ח ר' מאיר הירש הי"ו, הוספות: החתן ב"ר שמעי' קעסלער הי"ו, החתן בן הרה''ג ר' יצחק אייזיק פוקס שליט"א מו"ץ, החתן ב"ר דוב מארקאוויטש הי"ו, אחרון: הרה"ג יצחק אייזיק פוקס שליט"א מו"ץ בקהלתינו, מפטיר: הרה"ח ר' וואלף פערל הי"ו, הגבה: הרה"ח ר' שמעי' קעסלער הי"ו (וומסב''ג), גלילה: הרה"ח ר' יצחק מארקאוויטש הי"ו (בראזיל).

מוסף: הרה"ח ר' מאיר הירש הי"ו, פתיחה לאנעים זמירות: הרה"ג ר' שלמה טירנויער שליט''א (וומסב''ג).

נאכן דאווענען איז פארגעקומען די ברית לבן הנולד אצל ר' יושע שמואל לאנדא הי''ו, ווי דער רבי איז געווען סנדק. מען האט געענדיגט ארום 12:50.

אויפן וועג אהיים איז דער רבי ארויף צום ברית פון בן הנולד אצל הרה''ח ר' יואל ברא''ז פריעדמאן הי''ו, בביתו, ווי דער רבי איז געווען סנדק.
רעוא דרעווין

צו מנחה ושל"ש איז רבינו שליט''א אריינגעקומען אין ביהמ''ד ארום 6:20. מנחה: הרה"ח ר' דוד עקשטיין הי"ו, הוצאה והכנסה: הרה"ח ר' עמרם טירנויער הי''ו, כהן: הרה"ג ר' מענדל ברא"ש פריעדמאן הי"ו, לוי: הר''ר יואל בר"ע הירש שליט''א, שלישי: הרה"צ חיים אליעזר מייזליש שליט"א מווייטצען, הגבה רבינו שליט''א, גלילה: הרה"ח ר' שלום אלי' מארקאוויטש הי"ו.

זמירות ביי של"ש האט רבינו שליט"א מכבד געווען. אודה: הרה''ח ר' נח גפן הי''ו, שיר המעלות: הרה"ח ר' משה גאלדשטיין הי"ו.

ביי די תורה האט זיך רבינו שליט"א געשטעלט אויפן פסוק 'לך לך מארצך', יעדע זאך וואס א איד טוט ווערט אריין געשטעלט אין מקום המקדש, ווען מען טוהט מצוות ומעש"ט איז מען מקדש דעם מקום המקדש און חלילה פארקערט איז מען עס מטמא, והחי יתן אל לבו, וויפיל מאל און ווי סאך האט מען חלילה גורם געווען מטמא צו זיין, מען דארף זיך משים זיין אל הלב בתשובה און עוסק זיין בתורה, ודברי תורה מעלין מטומאה לטהרה.

ידיד נפש: הרה''ח ר' יצחק מארקאוויטש הי''ו, קל מסתתר: הרה''ח ר' משה כהנא הי''ו (ב''פ). רבינו שליט''א האט געבענטשט אויפן כוס און געזאגט שבע ברכות.

מעריב מוצ"ש: הרה''ח ר' אלחנן טויב הי''ו. נאך הבדלה איז מען אריבער זאגן א גוטע וואך, מען האט געענדיגט ארום 8:45.

מוצש''ק איז רבינו שליט''א אריבער צום חנוכת הבית אין שטוב פון הרה"ח ר' יוסף שאפפער הי"ו אין די סמיט גארדענס געגענט בגלילות קר''י, דער רבי האט קובע מזוזה געווען און געטרינקן לחיים און מאציל געווען מברכות קדשו.

▫️ סאטמאר'ע נייעס 🌴 ▫️

פרייטאג ערש''ק לך 'בצל הקודש' פון כ''ק רבינו הגה''ק שליט''א

אינדערפרי איידער תפילת שחרית איז פארגעקומען די ברית לבן הנולד אצל ר' אברהם יצחק שטערן הי"ו, ווי דער רבי איז געווען סנדק ומוהל.

רבינו שליט''א האט געדאווענט שחרית אין ביהמ"ד מהרש"א דקהלתינו הק', אינאיינעם מיט תלמידי ישיבה עסק התורה מאנסי בהנהלת הרה''ג ר' ישראל מרדכי זיידענפעלד שליט"א.
פארן דאווענען האט דער רבי תפילין געלייגט פאר די פאלגענגע בר מצוה בחורים.
בן הרה''ג ר' יעקב אלי' טורנהיים שליט''א ר''מ בישיבה.
ב"ר ישראל שלום אונגאר הי"ו.

נאכן דאווענען איז פארגעקומען א לחיים, ווי דער רבי האט משמיע געווען דברי חיזוק צום נייעם זמן, און דערביי איבערגעלאזט א קשיא אין די סוגיא וואס מען לערענט יעצט אין ישיבה פרק כל שעה במס' פסחים, און געבעטן די בחורים זאלן זיכן א תירוץ, און מסיים געווען בברכות קדשו.

▫️ סאטמאר'ע נייעס 🌴 ▫️

דאנערשטאג פרשת לך 'בצל הקודש' פון כ''ק מרן רבינו הגה''ק שליט''א

אינדערפרי איידער תפילת שחרית איז פארגעקומען די ברית לבן הנולד אצל ר' יעקב בערגער הי"ו, ווי דער רבי איז געווען סנדק ומוהל.

רבינו שליט''א האט געדאווענט שחרית אין ביהמ"ד הגדול. פארן דאווענען האט דער רבי תפילין געלייגט פאר'ן בר מצוה בחור ב"ר משה יקותיאל שווארטץ הי"ו.
ביים ליינען איז דער רבי געגאנגען הגבה, און נאכן דאווענען איז פארגעקומען א לחיים מיט'ן בר מצוה בחור בחדרו הפרטי.

אין די פארמיטאג שעה'ן איז געווען אויף א באזוך בקו''פ ביי רבינו שליט"א מחותנו הגה"צ אבד"ק בריזדאוויץ שליט"א, עס האט זיך פארמירט א שיינע שמועס, דער רבי האט מכבד געווען מיט לחיים, און געגעבן במתנה א סעט פון די ספרי לב אהרן דרושים ואגדה, און מאציל געווען מברכות קדשו.

נאכמיטאג ארום 6:15 האט דער רבי געדאווענט מנחה בביתו נאוה קודש.

פארנאכטס האט דער רבי מסדר קידושין געווען ביי די חופה פון די מחותנים ר' יואל בר''י כאירה הי"ו - ר' אברהם סרוגא הי"ו, באולם כינור דוד.

זמני כניסה בקודש פנימה איז געווען פון ארום 8:15 ביז 11:40 אויפדערנאכט, בביתו נאוה קודש אויף איהעל קט.

רבינו שליט''א האט געליינט תנאים אין די תנאים זאל בביתו נאוה קודש פון די מחותנים ר' שמואל פישער הי"ו - ר' פסח חיים קרעמער הי"ו.

רבינו שליט''א האט געדאווענט מעריב ארום 11:40 בביתו נאוה קודש אויף איהעל קט.

▫️ סאטמארע נייעס 🌴 ▫️