סאטמארע נייעס

דינסטאג פר' וארא 'בצל הקודש' פון כ''ק רבינו הגה''ק שליט''א

ארום 8:15 איז רבינו שליט''א אריינגעקומען צו תפילת שחרית אינעם ארטיגן ביהמ''ד בית חב''ד, נאכן דאווענען איז פארגעקומען די שמחת הברית מילה, פונעם רך הנימול בן הנולד להרב שלמה אהרן דענעבוים שליט"א פונעם ארטיגן בית חב"ד, רבינו שליט"א איז מכובד געווארן מיט אמירת הברכות.

דערנאך איז פארגעקומען א מסיבת לחיים לרגל די הילולא קדישא פון זקינו הרה''ק הבעל התניא זצוק''ל, דער רבי האט געטרינקן לחיים און געוואונטשן ברכות הקודש בזכותו הגדול פונעם בעל הילולא און דערנאך דערציילט לענגערע סיפורי קודש פון זקינו הבעל הילולא זי''ע, דערנאך האט דער רבי אהיימשפאצירט.

אין די פארמיטאג שעה'ן ארום 12:00 איז דער רבי געגאנגען שפאצירן בנאות דשא װי עס איז פארפירט געווארן הערליכע שמועסן בד"ת וסיפורי צדיקים.

די טעגליכע זמנים צום דאווענען זענען: שחרית בערך אום 8:00, צו מנחה קומט דער רבי אריין בערך 5:30. און מעריב איז נאכן זמן ר"ת.

▫️ סאטמאר'ע נייעס 🌴 ▫️

מאנטאג פר' וארא 'בצל הקודש' פון כ''ק מרן רבינו הגה''ק שליט''א במקום הנופש פאלם ספרינגס קאליפארניע

ארום 8:15 איז רבינו שליט''א אריינגעקומען צו תפילת שחרית אינעם ארטיגן ביהמ''ד בית חב''ד.

ביים אנקומען אין ביהמ''ד האט זיך דער רבי אומגעקוקט אויף די פרישע איינריכטונגן אינעם ביהמ"ד, און אינעם נייעם 'פאלם ספרינגס קאושער' געשעפט אינעם ביהמ''ד, און אין די נייע כשר'ע קיך וועלכע שטעלט צו עסן כשר למהדרין אינטער די השגחה פון התאחדות הרבנים, פאר די אידן וואס קומען אויף אפרוה אין פאלם ספרינגס

ביים ליינען האט דער רבי עולה געווען שלישי. נאכן דאווענען זענען צוגעקומען עטליכע וואקאנציאנערן שלום נעמען, דערנאך האט דער רבי אהיימשפאצירט, און גייענדיג איז פארפירט געווארן א שיינע שמועס בסיפורי צדיקים.

אין די פארמיטאג שעה'ן ארום 11:40 איז רבינו שליט''א - כדרכו בקודש - געגאנגען שפאצירן בנאות דשא, ווי עס איז פארפירט געווארן א הערליכע שמועס בדברי תורה וחסידות, מנהגי קודש וסיפורי צדיקים.

במשך די נאכמיטאג שעות האט דער רבי עוסק געווען בתורה בחברותא מיט הגה"צ אב"ד ראשית חכמה מאנטרעאל שליט"א. פארנאכט'ס אים 5:30 איז דער רבי אריינגעקומען צו תפילת מנחה, צווישן מנחה און מעריב האט דער רבי עוסק געווען בתורה אויף זיין פלאץ אין ביהמ"ד, און ביים זמן רבינו תם האט מען געדאווענט מעריב.

▫️ סאטמארע נייעס 🌴 ▫️

זונטאג פר' וארא 'בצל הקודש' פון כ"ק מרן רבינו הגה"ק שליט"א

רבינו שליט"א האט געדאווענט שחרית בבית מדרשינו הגדול בקר''י. פארן דאווענען האט רבינו שליט''א תפילין געלייגט פאר די פאלגענדע בר מצוה בחורים:
ב"ר חיים הכהן קאהן הי"ו.
ב"ר יוסף לייב הכהן סאנדער הי"ו.
און נאכן דאווענען איז פארגעקומען א מסיבת לחיים מיט די בר מצוה בחורים בחדרו הפרטי.

אין די נאכמיטאג שעה'ן איז רבינו שליט''א געווען אויף די וועכנטליכע באזוך אינעם בית השחיטה המהודרת.

נאכמיטאג ארום 4:00 האט רבינו שליט''א געדאווענט מנחה בביתו נאוה קודש. נאך מנחה איז דער רבי שליט''א ארויף בהיכל הישיבה סניף קדושת יואל, ווי דער רבי האט געלערנט מיט א חברותא מתלמידי הישיבה בחדרו הפרטי. אום 6:00 האט דער רבי געדאווענט מעריב בהיכל הישיבה, און נאך מעריב האט מען ארויסבאגלייט רבינו שליט''א בשירה ובזמרה 'כי מלאכיו מצוה לך'.

יציאת צדיק מן המקום עושה רושם

ארום 7:15 נאכמיטאג האט רבינו שליט''א פארלאזט ביתו נאוה קודש אין קרית יואל אויפן וועג צום וועסטשעסטער עירפארט פון ווי דער רבי איז אפגעפלויגן מיט א פריוואטע פליגער קיין פאלם ספרינגס קאליפארניע, ווי דער רבי וועט זיך אויפהאלטן אויף מנוחת הנפש די קומענדיגע 3 וואכן.

ביים אנקומען אין עירפארט אום 8:30 אויף די נאכט, האט זיך דער רבי שליט''א באגריסט מיט'ן לאנג יעריגע חברותא הגה"צ אבדק"ק ראשית חכמה מאנטריאל שליט"א און פארברענגט א קורצע וויילע.

כי מלאכיו יצוה לך לשמרך בכל דרכיך

ארום 9:05 האט זיך בשעטו''מ געהויבן די פריוואטע פליגער פון רבינו שליט''א. אין די ערשטע שעות אויפן פליגער האט רבינו שליט''א עוסק געווען בתורה אינאיינעם מיט'ן חברותא הגה''צ ר' יעקב אלי' שליט''א פאר א לענגערע צייט. דערנאך האט דער רבי געשריבן חידושי תורה און פארברענגט בסיפורי צדיקים און דערציילט היסטארישע מעשיות פון דער אלטער היים.

וקוי ה' יחליפו כח יעלו אבר כנשרים

ארום 11:53 אויפדערנאכט - ארטיגע זייגער - האט געלאנדענט די פריוואטע פליגער פונעם רבי'ן אין א נעבנדיגע עריפארט פונעם עיר הנופש פאלם ספרינגס.

פונעם עירפארט איז רבינו שליט''א תיכף צוגעפארן צו ביתו נאוה קודש די יערליכע אכסניא אין שטוב פון הרבני הנגיד ר' הערשל שפיץ הי''ו.

בזמן שהצדיק בעיר הוא הודה הוא זיוה והוא הדרה

▫️ סאטמאר'ע נייעס 🌴 ▫️

במוצאי יום גילה

מוצש''ק פר' שמות בצל הקודש פון כ''ק מרן רבינו הגה''ק שליט''א

ארום 8:45 איז רבינו שליט''א אנגעקומען אין שטוב פון הרה''ח ר' יוסף יאקאב הי''ו לרפו"ש ווי עס איז פארגעקומען די חתימת שטרות אויף א זכות אדיר וואס די חשובע בני משפחתו האבן אפגעקויפט אין די מקוה טהרה החדש אין קרית יואל, דער רבי האט גע'חתמ'ט די שטרות מיטן נדבן און דערנאך געטרינקן לחיים און מאציל געווען מברכות קדשו פאר ר' יוסף און פאר די גאנצע משפחה.

פון דארט איז רבינו שליט''א אריבער אין שטוב פון הרה''ח ר' אברהם יושע בר''י ווערצבערגער הי''ו ווי עס איז פארגעקומען די חתימת שטרות אויף א זכות אדיר וואס ער האט אפגעקויפט אין די מקוה טהרה החדש אין קרית יואל, דער רבי האט גע'חתמ'ט די שטרות מיטן נדבן און דערנאך געטרינקן לחיים און מאציל געווען מברכות קדשו פאר די גאנצע משפחה.

פון דארט איז רבינו שליט''א אריבער אין שטוב פון הרה''ח ר' דוד עקשטיין הי''ו ווי עס איז פארגעקומען די חתימת שטרות אויפ'ן פראכטפול איבערגעבויעט'ן 'חדר דוד' בביהמ''ד הגדול און א זכות אדיר וואס ער האט אפגעקויפט אין די מקוה טהרה החדש אין קרית יואל, דער רבי האט גע'חתמ'ט די שטרות מיטן נדבן און דערנאך געטרינקן לחיים און מאציל געווען מברכות קדשו פאר די גאנצע משפחה.

פון דארט איז רבינו שליט''א אריבער אין שטוב פון הרבני הנגיד ר' עקיבא הערש קליין הי''ו, ווי עס איז פארגעקומען די חתימת שטרות אויף א פאנטאסטישע סומע וואס ר' עקיבא הערש האט מנדב געווען פארן נייעם פרטכטפולען חתונה זאל אינעם בנין הת''ת החדש בנין קליין, דער רבי האט גע'חתמ'ט די שטרות מיטן נדבן און דערנאך געטרינקן לחיים און גאר ווארעם אנגעוואונטשען פארן נדבן, פאר די הנהלת המוסדות און פאר די גאנצע משפחה.

פון דארט איז רבינו שליט''א אריבער אין שטוב פון הרה''ח ר' יואל בר''מ גאלדשטיין הי''ו ווי עס איז פארגעקומען די חתימת שטרות אויף א זכות אדיר וואס ער האט אפגעקויפט אין די מקוה טהרה החדש אין קרית יואל, דער רבי האט גע'חתמ'ט די שטרות מיטן נדבן און דערנאך געטרינקן לחיים און מאציל געווען מברכות קדשו פאר די גאנצע משפחה.

דערנאך ארום 10:15 איז געווען זמני כניסה בקודש פנימה ביז אים 12:45.

ביי די זמני כניסה איז פארגעקומען די מעמד סיום כתיבת ספר תורה וואס ווערט געשריבן דורך הרה''ח ר' בעריש שעהנברוין הי''ו און ווערט אריינגעגעבן צו בית מדרשינו אהל פיגא בקר''י, רבינו שליט''א האט אריינגעשריבן די אותיות און דערנאך געטרינקן לחיים און מאציל געווען מברכותיו.

▫️ סאטמאר'ע נייעס 🌴 ▫️

רעוא דרעווין

צו מנחה ושל"ש איז רבינו שליט''א אריינגעקומען אין ביהמ''ד ארום 5:00. מנחה: הרה''ח ר' חיים יחזקאל הערשקאוויטש הי''ו, הוצאה והכנסה: הרה"ח ר' יואל ברי''א קליין הי"ו, כהן: הרה''ח ר' אברהם חיים כהן הי''ו, לוי: הרה''ח ר' הערש יוסף לעווי הי''ו, שלישי: הרה''ג ר' דוד פערל שליט''א, הגבה: רבינו שליט"א, גלילה: הרה''ח ר' חיים יודא שווארץ הי''ו (וומסב''ג).

זמירות ביי של"ש האט רבינו שליט"א מכבד געווען. אודה: הרה''ח ר' נח גפן הי''ו, שיר המעלות: הרה"ח ר' משה גאלדשטיין הי"ו.

ביי די תורה האט זיך רבינו שליט''א געשטעלט אויפן פסוק ''מי אנכי כי אלך אל פרעה'' און ארומגערעדט מיט לענגערע דברי תורה בעניני קדושה שטייענדיג בימי השובבי''ם, און געטייטשט אז פון משה רבינו זעט מען די גרויסע כח פון איין ראי' אז ווען בתי' האט אים געזעהן איז אריין אין איר די מידה פון רחמנות און ותמחול עליו, די זעלבע איז פארקערט, פון איין ראי' ווערט מען נתהפך לאיש אחר, ביי א מקוה זעט מען אז ווען מען מאכט השקה איז גענוג א חוט השערה, 'מה מקוה מטהר את הטמאים אף הקב''ה מטהר את ישראל' די זעלבע אויך איז אז א איד טוט תשובה אפילו נאר א תשובה פורתא העלפט אים הקב''ה זוכה צו זיין צו תשובה שלימה.

ידיד נפש: הרה''ח ר' מרדכי יעקב ווייס הי''ו (אוסטראליע), קל מסתתר: הרה''ח ר' ישראל אויש הי''ו (וומסב''ג) דער רבי שליט''א האט געבענטשט אויפן כוס און געזאגט שבע ברכות.

מעריב מוצ"ש: הגאון הדומ''ץ שליט''א. נאך הבדלה איז מען אריבער זאגן א גוטע וואך.

דערנאך איז רבינו שליט''א אראפגעגאנגען אין היכל ראזענבערג ווי דער רבי האט זיך מיט א קורת רוח אומגעקוקט אויף די לימודים ביי 'אבות ובנים', ווי יאר יערליך איידער'ן ארויספארן אויף מנוחת הנפש. פון דארט האט מען ארויסבאגלייט רבינו שליט''א בשירה ובזמרה 'כי מלאכיו מצוה לך' לרגל וואס רבינו שליט''א וועט אי"ה אפפליען אויף מנוחת הנפש קיין פאלם ספרינגס קאליפארניע מארגן זונטאג שפעט נאכמיטאג. מען האט געענדיגט 7:45.

▫️ סאטמאר'ע נייעס 🌴 ▫️

שב"ק פרשת שמות 'בצל הקודש' פון כ"ק מרן רבינו הגה"ק שליט"א.

פרייטאג צונאכטס ארום 5:05 איז רבינו שליט''א אריינגעקומען אין ביהמ"ד מעוטף בטליתו און צוגעגאנגען צו מנחה. קבלת שבת: הרה"ח ר' חיים בעריש שפילמאן הי''ו.

מען האט געענדיגט דאווענען ארום 6:40. נאכן דאווענען איז פארגעקומען די אפיעל פארן מוסדות דרכי שמואל עטה''ק בארה''ק. דערנאך איז דער עולם אריבער געגאנגען גוט שבת זאגן, און רבינו שליט''א איז אהיים לביתו נאוה קודש.

ארום 8:30 איז רבינו שליט''א אריינגעקומען צום שלחה"ט בהיכל השלחנות אינאיינעם מיט די תלמידי המתיבתא, און אנגעהויבן כדרכו בקודש 'שלום עליכם' ברגש ובנעימה.

אשת חיל: נכד רבינו הב' מאיר אליעזר בן הגה''צ רב דביהמ''ד ברך משה שליט''א, הגבאות הכוס לקידוש: נכד רבינו הרב יושע מרדכי אלעזר לאבין שליט''א חתן הגה''צ רב דביהמ''ד ברך משה שליט''א.

מיט די זמירות האט רבינו שליט''א מכבד געווען. כל מקדש: הרה''ח ר' דוד ארי' צענווירטה הי''ו (ירושלים) מנוחה ושמחה: הר''ר שלום מאיר עקשטיין שליט''א.

רבינו שליט''א האט געזאגט תורה אויפן פסוק "ויקם מלך חדש על מצרים אשר לא ידע את יוסף" און געטייטשט בדרך דרוש אין די סוגיא פון עשה דוחה לא תעשה.

קה אכסוף: הר''ר חיים יאקאב שליט''א (וומסב''ג), ברכהמ"ז: נכד רבינו הרב ליפא רובין שליט''א חתן הגה''צ רב דביהמ''ד ברך משה שליט''א.

עובדות וסיפורים די וואך האט רבינו שליט''א דערציילט פון הרה''ק הבעל התניא זצוק"ל, וואס די יארצייט געפאלט דינסטאג כ''ד טבת. קה רבון עלם: הרה''ח ר' משה יוסף ווערטהיימער הי''ו. די פרישע חתנים זענען אדורך נעמען פירות, דערנאך איז פארגעקומען די שלום זכר ביי ר' משה יושע ווייס הי''ו (וומסב''ג), אז ביום השביעי: הרה''ח ר' ישעי' מענדל ווייס הי''ו (אוסטראליע). מען האט געענדיגט ארום 11:25.

וביום השבת קודש

שב"ק צופרי איז רבינו שליט''א אריינגעקומען 9:20. פסוקי דזמרה: הרה''ח ר' ישראל אלימלך קליין הי''ו (וומסב''ג), וכרות האט דער רבי געזאגט פסוק בפסוק און צו שחרית צוגעגאנגען.

הוצאה והכנסה: הרה''ח ר' יושע טעללער הי''ו, פסוקי שמע ישראל: הרה''ח ר' אהרן זילבערשטיין הי"ו (וומסב''ג).

עליות. כהן: הרה''ח ר' אברהם יודא וויינפעלד הי''ו (אוסטראליע), לוי: הרה''ח ר' מרדכי יעקב ווייס הי''ו(אוסטראליע), שלישי: הרה''ח ר' מאיר הירש הי''ו, רביעי: הרה''ח ר' משה גאלדשטיין הי''ו, חמישי: החתן ב''ר מענדל הירש הי''ו, שישי: רבינו שליט''א.

נאכן עולה זיין האט רבינו שליט''א געמאכט די מי שברך וקריאת השם לרגל הולדת הבת ביי די פאלגענדע בעלי שמחה.
ר' ברוך שווארץ הי''ו.
ר' אלי' שניצער הי''ו.
ר' יחזקאל שרגא מערץ הי''ו.
ר' משה בר''מ פאלקאוויטש הי''ו.

שביעי: החתן ב''ר יואל זילבערשטיין הי''ו, הוספה: החתן ב''ר יואל ברי''א קליין הי''ו, אחרון: הרה''ח ר' פתחי' בראך הי''ו, מפטיר: הגאון הדומ''ץ שליט''א, הגבה: הרה''ח ר' ישראל שפילמאן הי''ו, גלילה: הרה''ח ר' שמואל עקיבא נויאוויטש הי''ו (וומסב''ג).

מוסף: הגאון הדומ''ץ שליט''א, פתיחה לאנעים זמירות: הרה"ח ר' יואל בר''א זילבערשטיין הי''ו.

נאכן דאווענען איז פארגעקומען די ברית לבן הנולד לר' יואל טאבאק הי''ו, ווי רבינו שליט''א איז מכובד געווארן מיט סנדקאות ומוהלות. מען האט געענדיגט 12:25.

▫️ סאטמאר'ע נייעס 🌴 ▫️

כי מציון תצא תורה ודבר ה' מירושלים

מיט גרויס פרייד און מיט געהויבענע געמיטער האבן אנשי שלומינו אין ירושלים עיה''ק אויפגענומען די בשורה מרנינה אז די צוויי חשובע פילאנטראפן הרה"ח המפואר בונה ומקים עולמות של תורה וחסד הרבני הנכבד מוה"ר אברהם בראך הי"ו ואתו עמו משנהו בדומה לו הרבני הנגיד הנכבד בנש"ק מוה"ר אברהם יהושע הכהן גלאנץ הי"ו חברי וועד העליון דקהלתינו הקדושות ומוסדותי' בארה"ק וועלכע זענען אין די טעג צוגאסט אויף א משפחה שמחה אין ארה"ק, האבן היינט ביום שב"ק געשנדר'ט ביי די ס"ת אויפבויען א בית גדול לה' ולתורתו בנין ביהמ"ד ברך משה שע"י קהלתינו הק' בירושלים עיה"ק, וואס באשטיייט היינט פון בלויז איין שטאקיגע געביידע.

אויסער זייער התנדבות אהערצושטעלן דעם בנין, האבן די צוויי נדיבים בעם אלס נחשונים לדבר מצוה תומ"י מקיים פסק געווען, און צוגעזאגט אסטראנאמישע סומעס, הרבני ר' אברהם מיט א מיליאן דאלער און הרבני ר' אברהם יהושע מיט א האלבע מיליאן דאלער. און צו זיי האט זיך אהנגעשלאסן, בא הכתוב השלישי, צו זיין א שותף לדבר מצוה הרבני הנגיד הנכבד בנש"ק ר' יהודה ווייס שליט''א פון קרית יואל, מיטן סומע פון א האלבע מיליאון דאלער.

די בשורה מרנינה קומט נאך וואס די צוויי נגידים חשובים חברי וועד העליון זענען בשלוחת הקודש פון כ"ק מרן רבינו הגה"ק שליט"א געזעסן אויף לענגערע מיטונגן דעם פארגאנגענעם דאנארשטאג מיט די געטרייע הנהלת הקהילה והמוסדות פון ירושלים וועלכע זענען נתמנה געווארן דורך כ''ק מרן רבינו הגה''ק שליט"א, ה"ה הרב שראל מרדכי פעלבערבוים, הרב ישכר בצלאל יאקאב, הרב נתן בנימין ראטה, הרב יהושע קליין שיחי', און אזוי אויך מיט אנדערע פערזענדליכקייטן אינערהאלב די קהלה, זיך צו באקענען פון די נאנט די ווערטשאפט בקרב קהלתינו הק' ומוסדותי', און איבער די פונקטליכע פלענער וואס שטייען גרייט אז מען זאל זיי אויספירן מכח אל הפועל, און נאך א טעלעפאנישע קאנפרענץ ערש"ק מיט כ"ק רבינו הגה"ק שליט"א איז באשלאסן געווארן בהסכמתו ובברכת קדשו אריינצוטאנצן אינעם פראיעקט.

דער נייער בנין ביהמ''ד וועט ענטהאלטן בעז''ה מערערע שטאקן, א מקוה טהרה, שטיבלעך און א היכל התורה, א היכל ביהמ''ד פון נאנט צו 500 זיצן, א עזרת נשים, א היכל הכולל און אן עקסטערן פליגל פאר די ישיבה קטנה.

ירושלימ'ער אידן וואס ווייסן און קענען דעם תל תלפיות אין צענטער פון שטאט פאר די לעצטע 20 יאר, קוקן שוין לאנג ארויס אז דער בנין וואס איז צר מהכיל זאל ווערן אויסגעברייטערט און אצינד זאגן זיי ברוך שהחיינו וקיימנו לזמן הזה.

מוצאי שב"ק זענען די חשובע נגידים ואישי הציבור אריבער אויף א באזוך בבית הגאון הגדול פוסק הדור מרן הראב''ד ירושלים שליט"א וועלכער האט געהייסן אריינברענגען לחיים לכבודם, און אנגעווינטשן די צוויי אז זיי זאלן קענען מוציא זיין מן הכח אל הפועל זייערע פעולות לטובה פאר'ן חינוך הטהור בארה"ק בכלל, און פאר קהלתינו הק' ומוסדותי' בפרט.

אין די יעצטיגע שעות קומט פאר א רייכע מסיבת קבלת פנים און הכרת הטוב מיט די השתתפות פון רבני קהלתינו הק' און נאך רבנים און גאונים פון ביד"צ העיה"ח ,פאר די חשובע נדיבים בעם ווי עס ווערט ארויסגעברענגט די התרגשות פון אנשי שלומינו בירושלים עיה"ק.

אי"ה אין די נאנטע טעג וועלן די צוויי ראשי הקהלה ואישי הציבור ר' אברהם און ר' אברהם יהושע, איבערגיין די פונקטליכע פלענער מיט די חברי הנהלה בירושלים און אהנהייבן דעם פראיעקט לשם ולתפארת.

בשליחות הקודש פון כ"ק רבינו שליט"א וועלן אי"ה מארגן די צוויי נגידים הי"ו אריבערפארן קיין בני ברק און פארברענגן בקרב קהלתינו הק' ומוסדותי' אינאיינעם מיט די געטרייע חברי הנהלה, און מחזק זיין אלע פראיעקטן בקרב קהלתינו, אריינגערעכנט דעם 'בנין החדש והמפואר די מיידל שולע בנות ארץ ישראל' וואס האלט שוין ביי די לעצטע פאזע פון פארענדיגט ווערן לשם ולתפארת.
אי"ה מאנטאג הבעל"ט וועל די צוויי נגידים בעם הי"ו אריבער פארן בשלוחת הקודש קיין בית שמש צו פארברענגן מיט די ארטיגע חברי הנהלה בקרב קהלתינו ומוסדותי', און מחזק צו זיין דעם נייעם צווייגל במסגרת מוסדות יטב לב בארה"ק, מיט פרישע פלענער לטובת אנשי שלומינו.

אי"ה קומענדיגע וואך איז געפלאנט אז די צוויי נגידים מראשי קהלתינו הק' שיחי' וועלן אריבערפארן קיין פאלם ספרינג'ס ווי רבינו שליט"א וועט זיך געפינען אויף מנוחת הנפש, און איבערגעבן די שיינע גריסן פון תלמידיו וחסידיו אנשי שלומינו בארה"ק, און גלייכצייטיג איבערשמועסן אלע גראנדיגעזע פלענער לטובת אנשי שלומינו בארה"ק.

אברה"ם אברה"ם ויאמר הננו

▫️ סאטמאר'ע נייעס 🌴 ▫️